పసి మొగ్గలపై ముప్పేట దాడి !

జీ కె వార్తా వ్యాఖ్య
దేశంలో నానాటికి అక్షరాస్యత శాతం వృద్ధి చెందుతోంది. అంటే చదువు పట్ల  తల్లిదండ్రులకు జిజ్ఞాస పెరుగుతోందన్న మాట. ఇది మంచి పరిణామమే. అయితే ఈ క్రమంలోనే కొన్ని అవాంఛనీయ, అమానవీయ పరిణామాలు చోటు చేసుకుంటుండటం ఆందోళన కలిగించే అంశం. తమ బిడ్డలు చదువుకుని ఉన్నత స్ధాయికి ఎదగాలన్న తాపత్రయం తల్లిదండ్రుల్లో అధికం కావడం సంతోషమే.  దీంతో తమ బిడ్డలకు మూడేళ్ళు నిండితే చాలు పసిపిల్లల మానసిక పరిపక్వతను పట్టించుకోకుండా వారి వారి స్తోమతను బట్టి కిడ్స్‌ స్కూళ్ళలోనో, కాన్వెంట్లలోనో తీసుకొచ్చి చేర్చేస్తున్నారు. ఆడుతూ పాడుతూ గడిపే సమయంలో నాలుగు గోడల మధ్య  ఉంటూ  అవసరమైతే అక్కడే కాలకృత్యాలు తీర్చుకుంటూ బాల్యాన్ని ఆ చిన్నారులు బంధీగా గడిపేస్తున్నారు. తల్లిదండ్రులు తమ చిన్నారులకు జీవనక్రమం నేర్పి బడికి పంపకుండా తమ ఇంటి వద్ద వారి అల్లరి భరించలేమంటూనో, బాల్యం నుంచే వారికి విద్యాబుద్ధులు నేర్పి వారిని ఉన్నతంగా తీర్చిదిద్దాలనో తాపత్రయంతోనే మొత్తం మీద నాలుగేళ్ళ ప్రాయం వచ్చే సరికి వారిని తీసుకొచ్చి ఉపాధ్యాయులకు, ఆయాలకు అప్పగించేస్తున్నారు. దీంతో అసలు సమస్య ఇక్కడ మొదలవుతోంది. ఆ పాఠశాలలో మన బిడ్డ ఒక్కరే కాదు కదా… మనలా ఆలోచించే వారి పిల్లలంతా అక్కడికే చేరుతుంటారు. మన బిడ్డ ఒక్కరినే మనం భరించలేక పాఠశాలల్లో చేర్చేస్తుంటే అంతమంది పసి మొగ్గలను లాలనగా చూడటం అంటే ఉపాధ్యాయ సిబ్బందికి తలకు మించిన భారమే. దీంతో అసలు సమస్య మొదలవుతోంది. పసిపిల్లలైనా… పదేళ్ళ ప్రాయం దాటిన పిల్లలైనా వారందరిని  అజమాయిషీ చేస్తూ పాఠాలు చెబుతూ భావిభారత పౌరులుగా తీర్చిదిద్దడం కత్తి మీద సామే. ఇందుకు ఉపాధ్యాయులకు ఎంతో ఓర్పు, నేర్పు కావాలి.  అయితే ఉపాధ్యాయులందరినీ ఒకే గాటకు కట్టలేము గానీ కొందరు ఉపాధ్యాయులు ముందు వెనుకా ఆలోచించకుండా క్రమశిక్షణ పేరుతో ఆటవికమైన శిక్షలు విధించడం…దండించడంతో కొన్ని సందర్భాల్లో ఊహించని ఘటనలు, పరిణామాలు చోటుచేసుకుంటున్నాయి. ఇలాంటి ఘటనలు ఆ చిన్నారులను మానసికంగా  తీవ్రంగా గాయపర్చి చదువంటే భయపడిపోయే పరిస్థితి ఏర్పడుతోంది. కొన్ని సందర్భాల్లో కొందరు ఉపాధ్యాయులు పిల్లలపై భౌతిక దాడులకు పాల్పడుతుండటంతో ఆ చిన్నారులు దివ్యాంగులైన సందర్భాలు కూడా లేకపోలేదు. అక్కడా ఇక్కడా ఎందుకు? మన ఆంధ్రప్రదేశ్‌లోనే గతంలో ఓ 13 ఏళ్ల బాలుడిని ఓ ఉపాధ్యాయుడు చితకబాదడంతో ఆ బాలుడు మృత్యువాత పడటం ఆందోళన కలిగించే  పరిణామం.  పసి పిల్లలను  కొట్టడం శిక్షార్హమని లోగడ ఢిల్లీ హైకోర్టు తీర్పు నివ్వగా విద్యా హక్కు చట్టం ప్రకారం పిల్లలను భౌతికంగా, మానసికంగా వేధించడం నేరమే.  అంతే గాక బాలల న్యాయ చట్టం ప్రకారం కూడా 18 ఏళ్ళ లోపు పిల్లలను కొట్టడంతో పాటు ధూషించడం చేయకూడదు. అయితే విద్యా శాఖ, శిశు సంరక్షణ శాఖల పర్యవేక్షణ కొరవడటంతో దాదాపు అన్ని పాఠశాలల్లో ఈ వేధింపులు నిత్యకృత్యమైపోయాయి. అవి శృతిమించితే, ఆ చిన్నారికి ఊహించరానిది ఏదైనా జరిగితే మాత్రమే అవి వెలుగు చూస్తున్నాయి. పసి పిల్లలకైతే ఆలనగా…లాలనగా, ఆరవ తరగతి నుంచి బాధ్యత, భవిష్యత్‌ను భోధిస్తూ పాఠాలు నేర్పవలసిన కొందరు ఉపాధ్యాయులు  ఆ ప్రాథమిక  సూత్రాలను విస్మరించి దండనే సులభమైన సాధనమని, అలాగైతేనే పిల్లలకు భయభక్తులు ఉంటాయనే అపోహతో కొన్ని సందర్భాల్లో శృతిమించి ప్రవర్తిస్తుండటంతో   అవాంఛనీయ పరిణామాలు చోటుచేసుకుంటున్నాయి. దీంతో పిల్లలు చదువంటే భయపడిపోయి  కొరకురాని కొయ్యలుగా తయారై విద్యకు దూరమైపోతున్నారు. హోం వర్కు చేయలేదనో, మార్కులు సరిగ్గా రాలేదనో, ఫీజు చెల్లించడంలో ఆలస్యం జరిగిందనో, అల్లరి చేస్తున్నారనో చిన్నారులను ఎండలో గంటల తరబడి నిలబెట్టడం, గుంజీలు తీయించడం, బెత్తంతో విచక్షణ మరిచి వాతలు వచ్చేలా కొట్టడం, తోటి పిల్లల ఎదురుగా వారిని అవమానపర్చేలా నోటికొచ్చినట్లుగా అవమానకర రీతిలో మాట్లాడటం పరిపాటైంది. ఆదర్శంగా మెలగవలసిన ఉపాధ్యాయుల్లో కొందరు రాక్షసంగా ప్రవర్తిస్తూ విద్యార్ధుల జీవితాలతో చెలగాటమాడుతున్నారు. సున్నితంగా వ్యవహరించవలసిన ఉపాధ్యాయులు కర్కశంగా  మారడంతో  అది దుష్పరిణామాలకు  దారి తీస్తుంది. తాజాగా హైదరాబాద్‌లో స్కూల్‌ డ్రెస్‌ వేసుకురాలేదని ఓ బాలికను బాలుర మరుగుదొడ్డి వద్ద గంట సేపు నిల్చోబెట్టగా మేమూ తక్కువ తినలేదంటూ విజయవాడలో హోం వర్కు చేయలేదని ఓ బాలుడిని వాతలు వచ్చేలా కొట్టడం వెలుగు చూసింది. దీంతో చదువంటే ఆ చిన్నారులు భయపడిపోయే పరిస్థితి ఏర్పడుతోంది.  అంతే కాదు పాఠశాలలకెళ్ళే ఆ చిన్నారుల మాన ప్రాణాలకు కూడా రక్షణ లేకుండా పోతోంది. పాఠశాలల సిబ్బందితో పాటు యాజమాన్యాల నిర్లక్ష్య ఫలితంగా ఇంటి నుంచి పాఠశాలలకు వెళ్ళిన చిన్నారులు క్షేమంగా తిరిగొస్తారన్న నమ్మకం ఉండటం లేదు. వారిపై లైంగిక దాడులు పరిపాటిగా మారాయి.  ఢిల్లీలోని ఓ పాఠశాలలో తాజా ఘటనే ఇందుకు నిదర్శనం. చిన్నారులను కంటికి రెప్పలా కాపాడవలసిన సిబ్బందే వారిని కాటేసి అఘయిత్యాలకు పాల్పడుతూ మానవత్వాన్ని మంటగలుపుతున్నారు. కొన్ని పాఠశాలల యాజమాన్యాలు కాలం చెల్లిన,  రెండవ శ్రేణి బస్సులను, వ్యాన్లను కొనుగోలు చేసి వాటి కండిషన్‌పై పర్యవేక్షణ చేయకపోవడంతో  ఆ బస్సులు తరుచు ప్రమాదాలకు కారణం కావడం, సిబ్బంది మద్యం మత్తులో వాహనాలు నడిపి ప్రమాదాలకు కారకులు కావడం నిత్య కృత్యంగా మారాయి. పిల్లల తల్లిదండ్రుల వద్ద ముక్కుపిండి వేలాది రూపాయలు ఫీజులుగా వసూలు చేసే  యాజమాన్యాలకు ఇవేమీ పట్టడం లేదు. దీనికి కారణం విద్య కూడా వ్యాపార వస్తువుగా మారిపోవడమే. చదువులో వెనుకబడిన వారిపై శ్రద్ధ చూపవలసింది పోయి ముందంజలో ఉండే పిల్లల ఎదురుగా వారిని అవమానకర్చే రీతిలో మాట్లాడటం పరిపాటిగా మారడంతో విద్యార్ధుల మధ్య స్పర్థలు, ఈర్ష్య, ద్వేషాలు పెచ్చుమీరుతున్నాయి. మాతృదేవోభవ…పితృదేవోభవ… ఆచార్య దేవోభవ అన్న నానుడి…. ఈ ముగ్గురూ పిల్లలకు ప్రత్యక్ష దైవాలు. ఎందుకంటే చిన్నారుల బాల్యమంతా ఇంట్లో… ఆ తర్వాత బడిలోనో గడుస్తుంది. వారి ప్రవర్తన,  దండన విద్యార్ధులపై తీవ్ర ప్రభావాన్ని చూపుతుంది.  ఇలాంటి పరిణామాలను కట్టడి చేసేందుకు ఇప్పటికే అనేక చట్టాలు ఉన్నా చట్టాలేమీ ఈ పోకడకు అడ్డు కట్ట వేయలేవు. ఉపాధ్యాయుల తీరు మారితే తప్ప విద్యా బోధనలో ఆరోగ్యకరమైన మార్పులు రావన్నది నిర్వివాదాంశం. ‘దండం దశ గుణ భవేత్‌’ అన్న ఆర్యోక్తిని ఈ నేపథ్యంలో పరిశీలించినట్లయితే  దానిని సక్రమ రీతిలో ఉపయోగిస్తే మంచి ఫలితాలు లభిస్తాయి…వేరే విధంగా ప్రయోగిస్తే దుష్ఫలితాలు సంభవిస్తాయి. దీనిని దృష్టిలో పెట్టుకుని ఉపాధ్యాయులు వ్యవహరిస్తే ఎలాంటి వివాదాలూ…అవాంఛనీయ ధోరణులకు తావుండదు.  అందుకు పాఠ్యాంశాల్లోనే కాదు విద్యా బోధనలోనూ మార్పులు రావలసి ఉంది. అందుకు చట్టాలున్నా అవి అక్కరకు రాకుండా ఉన్నందున ఉపాధ్యాయుల విద్యాబోధన తీరులో, వారి మనస్తత్వంలో మార్పులు రావలసిన అవసరం ఉంది. గురుశిష్యుల మధ్య సత్సంబంధాలు ఉంటేనే ఉభయ తారకమవుతుంది. తద్వారా విద్యా రంగంలో మనం ఆశిస్తున్న మార్పులను, ఫలితాలను సాధించడానికి వీలు కలుగుతుంది. అందుకు చట్టాలు కాదు త్రికరణ శుద్ధి అవసరమన్న విషయాన్ని గ్రహించడం శ్రేయస్కరం.

ఇంత దిగజారుడా !

 జీ కె వార్తా వ్యాఖ్య
ఎన్నికల వరకే విమర్శలు…అవి కూడా సైద్ధాంతిక అంశాలపై మాత్రమే…వ్యక్తిగత ఆరోపణలకు తావే లేదు…అధికారంలోకి ఎవరొచ్చినా ప్రతిపక్ష పార్టీ నిర్మాణాత్మక సహకారం…చట్ట సభల్లోనే కాదు బయట తారసపడినా గౌరవపూర్వకంగా పరస్పర వందనాలు…ఆత్మీయంగా గాఢంగనాలు…కుశల ప్రశ్నలు…పరస్పరం ఛలోక్తులు…మనసారా నవ్వుకోవడం…హుందాగా వ్యవహరించడం అయితే ఇదంతా గతం. నేటి వర్తమాన రాజకీయ ముఖచిత్రం అందుకు పూర్తి విరుద్ధం…ఎన్నికలు పూర్తయ్యాక అధికారంలోకి వచ్చిన పార్టీపై ఈర్ష్య, ద్వేషం, నిరంతరం విషం చిమ్మడం… వ్యక్తిగత విమర్శలు గుప్పించడం…చివరకు చట్టసభల్లో సైతం కనీస మర్యాదపూర్వకంగా అభివాదం చేసుకోకపోవడం..చర్చకు తావు లేకుండా నే పట్టిన కుందేలుకి మూడే కాళ్ళు అన్నట్లుగా మూర్ఖత్వంగా వ్యవహరిస్తుండటంతో అర్ధవంతమైన చర్చకు ఆస్కారం లేకుండా పోతోంది. దీంతో అటు పార్లమెంట్‌ అయినా..ఇటు అసెంబ్లీ అయినా ముఖ్యమైన అంశాలు, చట్టాలు సైతం చర్చ లేకుండానే ఆమోదం పొందడం లేక సమావేశాలు  ప్రతిరోజు వాయిదాల పర్వంతో సాగిపోతుండటంతో  ఎంతో విలువైన సమయం…కోట్లాది రూపాయల ప్రజా ధనం దుర్వినియోగం కావడం ఇటీవల కాలంలో సర్వసాధారణమైంది. అత్యున్నతమైన శాసనవ్యవస్థకు వేదికలైన చట్టసభల్లోనే పరిస్థితి ఇలా ఉంటే ఆ సభలకు వెలుపల పరిస్థితి ఇంకెంత దారుణంగా ఉంటుందో నంద్యాలలో నిన్న జరిగిన ఉప ఎన్నిక బహిరంగసభలో మన రాష్ట్ర ప్రతిపక్షనేత, వైఎస్సార్‌ కాంగ్రెస్‌ పార్టీ రథసారథి వైఎస్‌ జగన్మోహనరెడ్డి చేసిన వ్యాఖ్యలు అద్దం పడుతున్నాయి. ఈ వ్యాఖ్యలు  ఆయన బాధ్యతారాహిత్యానికి దర్పణం పడుతున్నాయి. శాంతిభద్రతల పరిరక్షణకు పాటు పడాల్సిన చట్ట సభ సభ్యుడే అందునా  ప్రతిపక్ష నేత హోదాలో, ఓ పార్టీకి సారథ్యం వహిస్తున్న నేతగా ఎంతో హుందాగా, బాధ్యతాయుతంగా వ్యవహరించవలసిన జగన్‌ రాష్ట్ర ముఖ్యమంత్రి ‘చంద్రబాబునాయుడిని నడిరోడ్డుపై కాల్చినా ఫర్వాలేదనిపిస్తోంది’ అని వ్యాఖ్యానించడం ప్రజాస్వామ్యప్రియులను, శాంతికాముకులను నివ్వెరపర్చింది. ఎంత రాజకీయ ప్రత్యర్థి అయినా ఓ రాష్ట్ర ముఖ్యమంత్రిని పట్టుకుని ఆయన ‘ముఖ్యకంత్రీ’ అని, కాల్చినా ఫర్వాలేదనిపిస్తోంది అని వ్యాఖ్యానించడం ఎంత మాత్రం సమంజసం కాదు…ఏ మాత్రం సమర్ధనీయం కాదు… ప్రతిపక్షనేతగా నిర్మాణాత్మకంగా, బాధ్యతాయుతంగా వ్యవహరించవలసిన జగన్‌ తరుచుగా సీఎంపై వివాదస్పద వ్యాఖ్యలు, కించపర్చేలా మాట్లాడటం పరిపాటైంది. గతంలో సీఎం కాలర్‌ పట్టుకోండి… చీపుర్లతో  కొట్టండి అంటూ కూడా బహిరంగ వ్యాఖ్యలు చేశారు. జగన్‌ వ్యాఖ్యలు, ప్రవర్తన చూస్తుంటే అధికారం కోసం, ఉప ఎన్నికలో గెలపు  కోసం ఇంత బరి తెగించి విచక్షణ మరిచి ఉన్మాదంగా మాట్లాడతారా అనిపిస్తోంది. ఒక ఉప ఎన్నికలో గెలుపు కోసమే ఆయన ఇలా మాట్లాడితే 2019 ఎన్నికల్లో గెలుపు కోసం ఆయన ఇంకెలా మాట్లాడతారో?, ఇంకెలా ప్రవర్తిస్తారోనన్న  అనుమానం కలుగుతోంది. ప్రతిపక్షనేత వ్యవహారం ఇలా ఉంటే ఆ పార్టీ నేతల ధోరణి కూడా అందుకు భిన్నంగా ఏమీ లేదు. ఉప ఎన్నికలో ప్రత్యర్థి పార్టీ వారు ఓటుకు రూ.5 వేలు ఇచ్చినా తీసుకుని ఓటు మాత్రం తనకు వేయండనడం వారి దిగజారుడుతనానికి నిదర్శనం. రాజకీయాల్లో, ఎన్నికల్లో ఎవరి సిద్ధాంతం వారు చెప్పుకుని ఓట్లు అడగడంలో ఎంత మాత్రం తప్పుకాదు. అంతే గాని స్థాయి కూడా చూడకుండా పూర్తి అక్కసుతో వ్యక్తిగత ధూషణలకు దిగడం, హింసను ప్రేరేపించేలా మాట్లాడటం ఎవరికీ తగదు. ప్రతిపక్షనేత తీరు ఇలా ఉంటే కుల విద్వేషాలు రెచ్చగొట్టేవారు కొందరు, ఎలాంటి వివాదాలతో సంబంధం లేని మహనీయుల విగ్రహాలను కూలగొట్టేవారు కొందరు తయారవుతుంటే వీరంతా ఈ  సమాజాన్ని ఎటు తీసుకెళుతున్నారో అర్థం కావడం లేదు. బాధ్యతాయుతంగా వ్యవహరించవలసిన రాజకీయ నాయకులు ఇలా బాధ్యతారాహిత్యంగా వ్యవహరించడం సమాజానికి ఎంతమాత్రం శ్రేయస్కరం కాదు. రాజకీయాల్లో నైతిక విలువలు పతనమవుతున్నాయనడానికి జగన్‌ వ్యాఖ్యలే నిదర్శనం. నిర్మాణాత్మక సహకారంతో, సైద్ధాంతిక పోరుతో ప్రజాభిప్రాయాన్ని కూడగట్టుకుని ప్రతిపక్షం అధికారంలోకి రావడానికి ప్రయత్నించాలే తప్ప ఇలా హింసాత్మక ధోరణి రెచ్చగొట్టేలా స్థాయిని,సభ్యతను మరచి మాట్లాడటం ఎంత మాత్రం తగదు. దీనివల్ల పొలిటికల్‌ మైౖలేజ్‌ కంటే మైనస్సే అధికమన్న సత్యాన్ని గ్రహిస్తే వారి రాజకీయ భవిష్యత్‌కు శ్రేయస్కరం.

ఇలాగైతే మరో ముఫ్పై ఏళ్ళు ప్రతిపక్షంలోనే.. 

జీ కె వార్తా వ్యాఖ్య
‘పరనింద..ఆత్మస్తుతి’ .. ఇదీ ! రెండు రోజుల పాటు సాగిన వైఎస్సార్‌ కాంగ్రెస్‌ పార్టీ ప్లీనరీ తీరు. అధికారంలోకి రావాలని ప్రతి రాజకీయ పార్టీ కోరుకోవడంలో తప్పు లేదు. అయితే అధికార పక్షాన్ని దుమ్మెత్తి పోయడమే ఎజెండాగా…అధికారమే పరమావధిగా అలవి కాని వాగ్ధానాలు గుప్పిస్తూ కనీసం వయస్సు, అనుభవం చూసైనా గౌరవించాలన్న ఇంగిత జ్ఞానం లేకుండా, ప్రభుత్వానికి నిర్మాణాత్మక సలహా, సూచనలు ఇవ్వకుండా సీఎం చంద్రబాబునాయుడుపై నోటికొచ్చినట్లు మాట్లాడడానికే ప్లీనరీ అన్నట్లు  ప్రతిపక్షనేత జగన్‌తో సహ ఆ పార్టీ నేతలు వ్యవహరించిన  తీరు చూస్తే వారి దిగజారుడు రాజకీయానికి అద్దం పడుతున్నాయి.  అధికారం కోసం అలమటిస్తున్న ప్రతిపక్షనేత జగన్‌ వైఖరి చూస్తుంటే ”కలల్ని సాకారం చేసుకోవాలని..లక్ష్యాన్ని సాధించాలని కోరుకోవడంలో తప్పు లేదు అయితే వాటి సాధనకు సరైన దిశలో పయనించి శ్రమించు” అని భారత మాజీ రాష్ట్రపతి దివంగత ఏపీజె అబ్దుల్‌ కలాం బోధించిన మాట ఒకటి ఈ సందర్భంగా నాకు స్ఫురణకు వస్తోంది… అయితే వైఎస్సార్‌ కాంగ్రెస్‌ పార్టీ ప్లీనరీ జరిగిన తీరు చూస్తే ఆ పార్టీ రథసారథి జగన్‌ అధికారం కోసం కలలు కనడమే గాని వాటిని సాకారం చేసుకునే ప్రయత్నం  చేస్తున్నట్లుగా కనిపించలేదు. ప్లీనరీలో తొలిరోజు చంద్రబాబును నోటికొచ్చినట్లు తిట్టడానికి కేటాయించగా రెండోరోజును అధికారంలో వచ్చేందుకు ఆచరణ సాధ్యం కాని వాగ్ధానాలు చేయడానికి ప్రత్యేకించారు. ప్లీనరీలో ఆ పార్టీ ఎమ్మెల్యే రోజా మాట్లాడుతుంటే చంద్రబాబును తిట్టమని చెప్పడం మైక్‌లో యావత్‌ సభికులకు వినిపించింది. తెలుగుదేశం పార్టీ నీడలో ఎదిగి ఆ తర్వాత పార్టీ ఫిరాయించి వైఎస్సార్‌ కాంగ్రెస్‌లో చేరిన గుడివాడ ఎమ్మెల్యే కొడాలి నాని అయితే సభ్య సమాజం తలదించుకునేలా..నివ్వెరపోయేలా ‘చంద్రబాబు చావు కోసం’ ఎదురుచూస్తున్నామనడం… అటువంటి వ్యాఖ్యల్ని ఖండించవలసిన జగన్‌ ఆ మాట విని ముసిముసినవ్వులు నవ్వడం చూస్తుంటే  అధికారం కోసం వారు ఎంతగా దిగజారిపోయారో అర్ధమవుతోంది. పైగా తమ పార్టీ ప్లీనరీ పండుగలా జరిగిందని… తెదేపా మహానాడు తద్దినంలా సాగిందని వైఎస్‌ రాజశేఖరరెడ్డి జమానాలో వసూలు చక్రవర్తిగా పేరొంది ఆ తర్వాత ఏ గూటి పక్షి ఆ గూటికే చేరుతుందన్నట్లు ఆ తర్వాత జగన్‌ పక్కకు చేరిపోయిన  బొత్స సత్యనారాయణ చేసిన వ్యాఖ్యలు చూస్తుంటే అధికారం కోసం జగన్‌తో పాటు ఆ పార్టీ నేతలు ఎంతగా అర్రులు చాస్తున్నారో.. అలమటిస్తున్నారో అర్ధమవుతోంది. బొత్స వ్యాఖ్యలు ‘తద్దినం’ అంటే తప్పుడు పని, ఉపయోగం లేని క్రియ అన్నట్లుగా ఓ వర్గం మనోభావాల్ని కించపర్చేలా మాట్లాడటం వారి దిగజారుడుతనానికి దర్పణం పడుతోంది. కాంగ్రెస్‌ పార్టీ అనాలోచిత నిర్ణయంతో విభజించబడిన శేషాంధ్రప్రదేశ్‌ను తిరిగి సంపూర్ణ ఆంధ్రప్రదేశ్‌గా తీర్చిదిద్దడానికి గత మూడేళ్ళగా అహర్నిశలు సీఎం చంద్రబాబు శ్రమిస్తున్నారు. ఈ విషయాన్ని యావత్‌  రాష్ట్ర ప్రజానీకం గుర్తించింది. అయితే సీఎం ఎంత కష్టపడుతున్నా ఏదో ఓ స్థాయిలో..ఎక్కడో అక్కడ జరిగిన తప్పిదం ప్రభావం ప్రభుత్వంపై పడుతుంది. దాంతో సహజంగానే ప్రభుత్వం అంటే ఎంతో కొంత వ్యతిరేకత ఏర్పడుతుంది. అయితే ఈ పరిస్థితిని అనుకూలంగా మార్చుకోవడంలో ప్రధాన ప్రతిపక్షం వైఎస్సార్‌ కాంగ్రెస్‌ పార్టీ నిర్మాణాత్మక పాత్ర పోషించడం లేదన్నది నిర్వివాదాంశం. ఎన్నికలకు ఇంకా రెండేళ్ళ వ్యవధి ఉండగానే అధికారంలోకి వస్తే ఇవి చేస్తాం అంటూ ఆచరణ సాధ్యం కాని వాగ్ధానాలు గుప్పిస్తూ మేనిఫెస్టోను విడుదల చేయడం, అందులోనూ ప్రతిపక్షనేత జగన్‌ తెలివితేటలు…సొంత ఆలోచనలు లేకుండా ప్రశాంత్‌ కిశోర్‌ అనే ఎన్నికల వ్యూహకర్తకు బాధ్యతలు అప్పగించేసి ఆయనను పార్టీ శ్రేణులకు పరిచయం చేయడం…. అధికారంలోకి వస్తే 30 ఏళ్ళు నేనే సీఎంగా ఉంటానని పగటి కలలు కంటూ ప్రకటనలు చేయడం చూస్తే వారి అధికారకాంక్ష ప్రస్ఫుటమవుతోంది. వాగ్ధానాలు గుప్పించడంతో పాటు రాష్ట్రమంతా పాదయాత్ర చేస్తానని జగన్‌ ప్రకటించగా దానిని పాదయాత్రగా ఎవ్వరూ భావించడం లేదు. దీనిని అంతులేని ఓదార్పు యాత్ర కొనసాగింపేనని అంతా భావిస్తున్నారు. నిర్మాణాత్మకంగా వ్యవహరింవలసిన ప్రతిపక్షం ప్రతి అంశాన్నీ రాజకీయ కోణంలో చూస్తూ విమర్శలు చేస్తూ నిర్మాణాత్మకంగా గాక విచ్ఛిన్నకర శక్తిగా తయారు కావడం ఈ రాష్ట్ర ప్రజల దౌర్భాగ్యం.  ప్రతిపక్షమంటే అధికారపక్షాన్ని గుడ్డిగా  వ్యతిరేకించడం కాదన్న విషయం అధికారంకై పరితపిస్తున్న జగన్‌ తెలుసుకుంటే అది ఆయనకే కాదు ఈ రాష్ట్ర ప్రజలకు కూడా శ్రేయస్కరం. అమరావతి వద్ద నవ్యాంధ్ర రాజధానిని ముందు నుంచి వ్యతిరేకిస్తున్న  జగన్‌ తాను అధికారంలోకి వస్తే రాజధాని ప్రాంతాన్ని మార్చివేస్తారా? అన్న విషయమై స్పష్టత లేదు. మరో వైపు  నవ్యాంధ్ర రాజధాని నిర్మాణానికి, ఇతరత్రా అభివృద్ధి పనులకు రుణం ఇవ్వొద్దని ప్రపంచ బ్యాంక్‌ను కోరడం, క్షణం క్షణం ఆలోచనలను మార్చుకోవడం.. చూస్తే మూడు దశాబ్ధాలు సీఎంగా ఉంటానన్న నాయకునికి ఉండవలసిన లక్షణమేనా? ప్రతిపక్షనేతగా అధికారపక్షం లోపాల్ని ఎత్తిచూపడంలో తప్పులేదు.. అయితే అది నిర్మాణాత్మకంగా..సహేతుకంగా ఉండాలే గాని నోరుందని ఇష్టమొచ్చినట్లు మాట్లాడటం నాయకుని సలక్షణం కాదు. అధికార పక్షం తప్పుల్ని వెలుగులోకి తేవడానికి సదరు ప్రతిపక్షనేతకు పార్టీ యంత్రాంగంతో పాటు బలమైన శక్తిగా ఉన్న మీడియా కూడా చేతిలో ఉంది. ప్రతి అంశాన్ని విమర్శనాకోణంలో చూస్తూ కేవలం భజన కోసమే నీ సొంత ప్రయోజనాల కోసం ఈ మీడియాను ఉపయోగిస్తే దాని వల్ల ప్రయోజనం కంటే నష్టమే అధికంగా ఉంటుందన్న విషయాన్ని ఎంత త్వరగా గ్రహిస్తే ఆయనకు అంత శ్రేయస్కరం. జగన్‌ తీరు..పంథా మార్చుకోకపోతే మరో 30 ఏళ్ళు ప్రతిపక్షంగా ఉండటం మాత్రం ఖాయం.

గౌరవాన్ని నిలబెట్టుకోకపోవడం ఎవరి తప్పు ?

జీకె వార్తా వ్యాఖ్య
ఆంధ్రప్రదేశ్‌ బ్రాహ్మణ కార్పొరేషన్‌ చైర్మన్‌ పదవి నుంచి ఐవైఆర్‌ కృష్ణారావును తొలగించి ఆయన స్థానే తెలుగుదేశం పార్టీ నాయకుడు వేమూరు ఆనంద సూర్యను నియమించినప్పటి నుంచి…సామాజిక మాధ్యమాలలో వస్తున్న  కొన్ని కామెంట్లు….ముఖ్యమంత్రి చంద్రబాబునాయుడుపై చేస్తున్న నిందారోపణలను  చూస్తుంటే ఈ కుల జాఢ్యం సోకాల్డ్‌ మేథావుల్లో….(లబ్ధ ప్రతిష్ఠులైన పాత్రికేయులు కొందరిలో కూడా..) ఏ మాత్రం మినహాయింపు లేకుండా ప్రబలిపోతోందో అర్థం చేసుకోవచ్చు….చంద్రబాబును బ్రాహ్మణ ద్వేషి అంటూ అభివర్ణించాడో మహానుభావుడు…అవును చంద్రబాబు బ్రాహ్మణ ద్వేషే….కాబట్టే ఇప్పటివరకూ ఏ ప్రభుత్వమూ.. ఏ రాజకీయ పార్టీ కలలోనైనా తలపెట్టని రీతిలో  వందల కోట్ల రూపాయలతో  ఓ కార్పొరేషన్‌  ఏర్పాటు చేసి పేద బ్రాహ్మణల జీవితాలకో ఆసరా…ఆశా కలిపించారు…కృష్ణారావును తొలగించినా ఆ స్థానంలో మరో సమర్ధుడైన పార్టీ నాయకుడిని  నియమించారు… అది కూడా బ్రాహ్మణ ద్వేషంతోనేనేమో…  మరి కొందరు పాత్రికేయ మేథావులు… సోషల్‌ మీడియాలో పోస్టింగ్స్‌ను స్పోర్టివ్‌గా తీసుకోకుండా కేవలం కృష్ణారావుపై ద్వేషంతో ఆయనను తొలగించారంటూ సన్నాయి నొక్కులు నొక్కుతున్నారు… నిజమే తన మీదా (తన ఇంట్లో ఆడవారిపై కూడా) తన ప్రభుత్వంపై సభ్యతా సంస్కారాలు లేకుండా కొందరు పెట్టిన పోస్టింగ్స్‌ను తాను పునరావాసం కల్పించిన విశ్రాంత అధికారి షేర్‌ చేయడాన్ని కూడా లైట్‌ తీసుకోకపోవడం చంద్రబాబు తప్పే కదా…. మరి ఇలాగే ఆ మేథావి పాత్రికేయుల వ్యక్తిగత జీవనంపైనా, వాళ్ళ కుటుంబ సభ్యుల పైనా కూడా అసభ్యకర పోస్టింగ్స్‌ను  ఈ విశ్రాంత అధికారి షేర్‌ చేసి ఆనందిస్తే లైట్‌ తీసుకునే పెద్ద మనసు ఈ మేథావులకున్నట్లు చంద్రబాబుకు లేకపోవడం ఆయన తప్పే… గత కాంగ్రెస్‌ ప్రభుత్వం తిరుమల తిరుపతి దేవస్థానం ఇఓగా ఉన్న ఈ కృష్ణారావును అప్రాధాన్య పోస్ట్‌లో వేస్తే రాష్ట్ర విభజన తరువాత ఏర్పడ్డ నవ్యాంధ్రప్రదేశ్‌కు ప్రప్రథమ చీఫ్‌ సెక్రటరీగా ఏరికోరి నియమించడం కూడా చంద్రబాబు బ్రాహ్మణ ద్వేషంతోనే చేశారు…. చీఫ్‌ సెక్రటరీ హోదాలో ఉండి కూడా ప్రభుత్వ అభిలాషకు వ్యతిరేకంగా రాజధానిని అమరావతిలో కాకుండా దొనకొండలో ఏర్పాటు చేయాలని అధికారిక లేఖ రాసినా ఉపేక్షించి ఆయనను కొనసాగించడం కూడా చంద్రబాబు బ్రాహ్మణ ద్వేషంతోనేనేమో… ఆఖరుగా పార్టీ ప్రతిపక్షంలో ఉండగా అనేక పోరాటాలు చేసి ఎత్తిన జెండా దించకుండా అహర్నిశలు కష్టపడి పార్టీని అధికారంలోకి తెచ్చిన అర్హులైన కార్యకర్తలెందరో  ఉండగా ఏ గూటి పాట ఆ గూటిలో పాడే విశ్రాంత అధికారిని తీసుకొచ్చి కార్పొరేషన్‌ చైర్మన్‌ చేసి కనకపు సింహాసనమెక్కిస్తే… తన పాత వాసనలు మరిచిపోకుండా సభ్యతా సంస్కారాలను తుంగలో తొక్కిన….పెద్ద మనిషిని క్ష మించి అక్కున చేర్చుకుని మరింత అందలాలెక్కించకుండా….ఇంటికి సాగనంపడం కూడా పాపం… చంద్రబాబు గారి తప్పేనేమో…!!!

ఏమిటీ వేలం వెర్రి ? 

 జి.కె.వార్తా వ్యాఖ్య
 వినోద సాధనంలో సినిమా ఓ బలమైన ఆయుధం. దైనందిన సమస్యల నుంచి కాస్త రిలీఫ్‌ కోసమో, ఆహ్లాదం, ఆనందం కోసమో మన వినోద ప్రపంచం వైపు అడుగులేస్తాం….వినోదం అనగానే మనలో చాలా మంది సినిమా పట్లే ఆకర్షితులవుతాం….ఇంట్లో టీవీల్లో వివిధ ఛానళ్ళలో అనుక్షణం అనేక సినిమాలు వస్తున్నా పలు కారణాలతో ధియేటర్లలో సినిమా చూడడానికే మనం ప్రాధాన్యం ఇస్తాం…అందులో అగ్ర హీరోల చిత్రాలైతే విడుదలైన తొలినాళ్ళలోనే చూసేందుకు ముందే పరిగెడతాం….ముఖ్యంగా ఆ చిత్రంలో  భారీ సెట్టింగ్‌లు, గ్రాఫిక్స్‌ గురించి పెద్ద ఎత్తున పబ్లిసిటీ  జరిగితే ఇక వేరే చెప్పనక్కర్లేదు. విడుదలైన రోజునో, ఆ మర్నాడో ఆ చిత్రాన్ని చూసి గర్వంగా ఫీలయ్యేవారు, అనిర్వచనీయమైన ఆనందం పొందే వారే అత్యధికులు. అందులో అభిమాన హీరో అయితే ప్రత్యేకంగా చెప్పనక్కరలేదు. ఇతర హీరోల అభిమానులు కూడా ఆ చిత్రం ఎలా ఉందో అన్న ఉత్సుకతతో చూడడానికి ఎగబడతారు. అభిమానుల్లో యువతే అత్యధికులు కావడంతో ఇక ఆ హంగామా  ఎలా ఉంటుందో ఊహించవచ్చు. ఈ నేపథ్యంలో ఒక్కొక్క పర్యాయం అభిమానం దురభిమానంగా మారుతున్న సందర్భాలూ లేకపోలేదు. హీరోలంతా స్నేహభావంతో కలిసి మెలిసి సాగుతుంటే దిగువ స్థాయిలో అభిమానులు మాత్రం బాహాబాహికి దిగిన సంఘటనలు కోకొల్లలు. భారీ సెట్టింగ్‌లు, గ్రాఫిక్స్‌తో నిర్మించిన చిత్రాలంటే యువత ముందే పరుగులు పెడతారు. అందునా ఆ చిత్రాల గురించి జరిగే విపరీతమైన పబ్లిసిటీ వారిని మరింత ఉసిగొల్పుతుంది. ఇక్కడే  అసలు కథ మొదలవుతుంది. సినీ ప్రేక్షకుల ముఖ్యంగా యువత బలహీనతను ఆసరాగా తీసుకుని చిత్ర నిర్మాణ సంస్థ మొదలుకుని ఎగ్జిబిటర్‌ వరకు వారిని దోచుకుందామనే చూస్తారు. ఈరోజు ప్రపంచ వ్యాప్తంగా తొమ్మిది వేల ధియేటర్లలో  విడుదలైన బాహుబలి 2  భారీ బడ్జెట్‌ చిత్రం ఈ పరిస్థితికి అద్దం పడుతోంది. మనం ఇంతవరకు క్రికెట్‌ బెట్టింగ్‌లే చూశాం. ఈ చిత్రం ద్వారా ఇపుడు సినిమా బెట్టింగ్‌లు కూడా మొదలయ్యాయి. ఈ చిత్రం విదేశీ చిత్రాల కలక్షన్లను తలదన్ని వసూళ్ళు చేస్తుందని బెట్టింగ్‌లు కూడా కాశారు. ఇదంతా చూస్తుంటే మనం ఎటు వెళుతున్నామో అర్ధం కాని పరిస్థితి నెలకొంది. ఇంత విశాల భారత దేశంలో మరే సమస్యలు లేనట్టుగా గత కొద్ది రోజులుగా అందరి చూపు, చర్చ ఈ సినిమాపైనే అంటే ఆవేదన కలిగిస్తోంది. విద్యార్ధులకు అసలే ఇది పరీక్షా కాలం… ఈ సమయాన   ఈ సినిమా గురించి చర్చ, బెట్టింగ్‌లు, విడుదలయ్యాక చూడాలన్న ఆతృత వెరశి యువత భవిష్యత్తు ప్రశ్నార్ధకమవుతోంది.  అంతకు మించి ఈ చిత్రం పేరుతో ప్రేక్షకులను దోచుకోవడం దారుణంగా ఉంది. చిత్ర నిర్మాణ సంస్థ కోరిందని రాష్ట్ర ప్రభుత్వం కూడా ఈ చిత్రం అత్యధిక షో లను ప్రదర్శించుకునేందుకు అనుమతి ఇవ్వడంతో పాటు టిక్కెట్ల రేట్లను పెంచుకునేందుకు అనుమతి ఇవ్వడంతో అంతా కుమ్మక్కై ప్రేక్షకుల దోపిడీకి తెర తీశారు. బ్లాక్‌ మార్కెట్‌ను అరికట్టి ధియేటర్ల  నిర్వహణను పర్యవేక్షించవలసిన పోలీస్‌, రెవెన్యూ యంత్రాంగాలు ఈ విషయంలో   ప్రేక్షక పాత్ర వహిస్తున్నాయంటే  అతిశయోక్తి కాదు. ధియేటర్ల వద్ద పరిస్థితి చూస్తే  సినిమా టిక్కెట్ల బ్లాక్‌ మార్కెట్‌ను అరికట్టవలసిన ఈ విభాగాల సిబ్బంది కళ్ళు మూసుకున్నారా అనే అనుమానం కలుగుతోంది. దీంతో ప్రేక్షకుల దోపిడీ యదేచ్ఛగా కొనసాగిపోతోంది. అసలే ధియేటర్లలో టిక్కెట్ల ధరలు అధికంగా ఉన్నాయనుకుంటే ఈ చిత్రం గురించి విపరీతమైన పబ్లిసిటీ, ప్రభుత్వం ఇచ్చిన అనుమతి ఫలితంగా ధియేటర్ల యాజమాన్యాలు ముఖ్యంగా మల్టీఫ్లెక్స్‌ల నిర్వాహకులు  టిక్కెట్ల ధరలు అమాంతంగా పెంచేశారు. బెనిఫిట్‌ షోల  టిక్కెట్ల ధరలైతే ఆరొందలు పైనే  దాటేసాయి. కొన్ని చోట్ల రెండు వేల రూపాయలకు కూడా విక్రయించారంటే పరిస్థితి ఎంత దారుణంగా ఉందో అర్ధమవుతోంది. అసలు ఈ బెనిఫిట్‌ షోలు ఎవరి  ‘బెనిఫిట్‌’కో అర్ధం కావడం లేదు. బాహుబలి 2 చిత్రాన్ని చాలా గొప్పగా తీసి ఉండొచ్చు….దీని నిర్మాణానికి భారీ వ్యయం అయి ఉండొచ్చు…. అలాగని ప్రేక్షకులను దోపిడీ చేస్తుంటే  ప్రభుత్వ యంత్రాంగం ఇందుకు సహాయపడటం విస్మయం కలిగిస్తోంది. ఈ దోపిడీ ఒక్క రాజమహేంద్రవరంలోనే కాదు ఈ చిత్రం విడుదలైన అన్ని ప్రాంతాల్లో ఇదే పరిస్థితి నెలకొనడం బాధాకరం. ఈ పరిణామాలకు ఎవరో ఒకరు బాధ్యులు కారు. అందరూ పాత్రధారులే. అయితే చివరకు నష్టపోయేది మాత్రం ప్రేక్షకులే. ఇంత సువిశాల భారతదేశంలో  వేరే సమస్యలేమీ లేనట్టుగా  ఇదే పెద్ద సమస్య అన్నట్టుగా వ్యవహరిస్తున్న తీరు క్షమార్హం కాదు. ముఖ్యంగా సామాజిక సమస్యలపై కత్తి దూయవలసిన ప్రింట్‌ ,ఎలక్ట్రానిక్‌ మీడియా  కూడా ఈ చిత్రం గొప్పదనం గురించి విపరీతమైన ప్రచారం చేస్తూ ప్రేక్షకుల్లో ఉత్సుకత పెంచుతూ ఈ విపరీతమైన ధోరణిి, పరిణామాల్లో తానూ భాగస్వామ్యమైంది. బాధ్యతయుతంగా వ్యవహరి ంచవలసిన మీడియా, సినిమాల ద్వారా సామాజిక సందేశాన్ని వ్యాప్తి చేయవలసిన సినీ లోకం ధోరణి మారకుంటే మనం ఎటు పయనిస్తున్నామో మనకే తెలియని గందరగోళం ఏర్పడుతుంది. బహు పరాక్‌ !…..

బాధ సహజం… తీరు అసహజం..

(జి.కె.వార్తా వ్యాఖ్య)
 
మంత్రివర్గంలో చోటు లభించాలని ప్రతి అధికార పార్టీ ఎమ్మెల్యే కోరుకుంటారు. అందునా సీనియర్లు, చిరకాలంగా పార్టీకి అంకితభావంతో పనిచేస్తున్న వారు ఆశించడంలో అసలు తప్పులేదు. పార్టీకి సేవలందిస్తున్న తమకు గుర్తింపు, గౌరవం దక్కాలని వారు కోరుకోవడం సహజమే. ఈ నేపథ్యంలో ఆదివారం జరిగిన రాష్ట్ర మంత్రివర్గ విస్తరణలో చోటు దక్కకపోవడంపై తెలుగుదేశం పార్టీలో  గోరంట్ల బుచ్చయ్యచౌదరి, ధూళిపాళ నరేంద్ర, కాగిత వెంకట్రావ్‌ వంటి ఎందరో సీనియర్‌ శాసనసభ్యుల ఆవేదన అర్ధం చేసుకోదగినదే. అయితే వారు తమకు పదవి దక్కలేదని నిరసన తెలియజేయడం కాకుండా రాష్ట్ర వ్యాప్తంగా ఎంతో మంది తెలుగుదేశం పార్టీ కార్యకర్తల మనోభావాలు వారి స్వరంలో వినిపించాయన్న విషయాన్ని  ఆ పార్టీ శ్రేణులు సమర్ధిస్తున్నాయి. ఈ వ్యవహారంలో కొందరు తమ  మనోభిప్రాయాలను బహిరంగంగా వ్యక్తం చేయగా మరి కొందరు మర్మగర్భంగా వ్యక్తం చేశారు.  ఈ నేపథ్యంలో కార్యకర్త ఎమ్మెల్యే కావాలనుకోవడం, ఎమ్మెల్యే మంత్రి కావాలనుకోవడం తప్పుకాదని సాక్షాత్తూ తెదేపా అధినేత, సీఎం చంద్రబాబునాయుడే వ్యాఖ్యానించడం ఈ సందర్భంగా ప్రస్తావనర్హం. సుదీర్ఘ కాలంగా పార్టీ జెండా మోస్తున్న కార్యకర్తలకు కాకుండా అటూ ఇటూ రంగులు మార్చే వారికి పార్టీ ప్రాధాన్యం ఇస్తోందని క్యాడర్‌లో నెలకొన్న అసంతృప్తి భావాలను పరిగణనలోకి తీసుకోవలసిన బాధ్యత పార్టీ శ్రేయస్సు దృష్ట్యా అధిష్ఠానానికి ఉందనడం నిర్వివాదాంశం. అయితే తమ అసంతృప్తిని పార్టీకి సముచిత మార్గంలో తెలియజేసే విధానం ఉండగా పార్టీని బ్లాక్‌ మెయిల్‌ చేసే విధంగా ధిక్కార ధోరణి ప్రదర్శించడం మాత్రం తెలుగుదేశం పార్టీలో సరికొత్త పరిణామం.  అయితే ఆ వ్యక్తీకరణ క్రమశిక్షణను ఉల్లంఘించి హద్దులు దాటడం ఏ పార్టీకైనా మంచిదికాదు. క్రమశిక్షణకు ప్రాణమైన తెలుగుదేశం పార్టీలో ఈ ఘటనలు చోటుచేసుకోవడం అసలు మంచిది కాదు. రాజమహేంద్రవరంలో అధికార తెలుగుదేశం పార్టీలో పరిణామాలు ఇందుకు తాజా ఉదాహరణ. ఇక్కడ అధికార తెలుగుదేశం పార్టీ  కార్పొరేటర్లు  నగర పాలనలో కీలకమైన కార్పొరేషన్‌ బడ్జెట్‌ సమావేశాన్ని బహిష్కరించడమే కాకుండా మూడు రోజుల్లో తమ నాయకునికి తగిన గౌరవం ఇచ్చే విషయం తేల్చకపోతే రాజీనామాలు చేస్తామని ఆ పార్టీ అధిష్ఠానానికి అల్టిమేటమ్‌ ఇవ్వడాన్ని ఎవరూ జీర్ణించుకోలేకపోతున్నారు. మూడున్నర దశాబ్ధాల తెలుగుదేశం క్రమశిక్షణాయుతమైన ప్రయాణంలో ఈ పరిణామాలే ఇపుడు హాట్‌ టాఫిక్‌గా మారాయి. సహజ విరుద్ధమైన ఈ వ్యవహారాలు ఇపుడు తెలుగుదేశం నాయకత్వానికే గాక ఇతర పార్టీలకు కూడా ఆశ్చర్యం కలిగిస్తున్నాయి. గతంలో మంత్రి పదవి రాలేదన్న అసంతృప్తిని లోలోన వ్యక్తం చేయడమేగాని బహిర్గత పర్చడం తెదేపా ప్రయాణంలో బహుశ ఇదే ప్రథమం. రాజమహేంద్రవరంలో అయితే సీనియర్‌ నేత గోరంట్లకు అమాత్య పదవి ఇవ్వలేదన్న అసంతృప్తి, మనస్తాపంతో కార్పొరేటర్లు బడ్జెట్‌ సమావేశాన్ని బహిష్కరించారు. అయితే ఈ హైడ్రామాకు ఆయన సమ్మతి ఉంటుందని  నూటికి నూరుపాళ్ళు ఎవరూ భావించడం లేదు. ఎందుకంటే  బుచ్చయ్యచౌదరి ఎక్స్‌ అఫీషియో సభ్యుని హోదాలో నిన్నటి కౌన్సిల్‌ సమావేశానికి హాజరయ్యాక కాని తమ పార్టీ కార్పొరేటర్లు సమావేశానికి రాలేదన్న విషయం తెలియకపోవడమే ఇందుకు నిదర్శనం. బుచ్చయ్యచౌదరే కాదు ఆ పార్టీ శ్రేయస్సు కోరుకునే వారెవరూ రాజమహేంద్రవరం ప్రజల దృష్టిలో, ప్రతిపక్షాల దృష్టిలో పార్టీ పరువు ఈ విధంగా పోవడాన్ని హర్షించబోరు.  ఈ ధోరణి రాజమహేంద్రవరం నగర పాలక సంస్థగా ఆవిర్భవించాక జరిగిన మూడు ఎన్నికల్లోనూ తెలుగుదేశం పార్టీని నమ్మి మూడు పర్యాయాలు ఆ పార్టీని గెలిపించిన ఓటర్లను అవమానించడమే. అధికార తెలుగుదేశం పార్టీ చర్యలపై ప్రతిపక్ష వైఎస్సార్‌ కాంగ్రెస్‌ పార్టీ సభ్యులు కూడా చెవిలో పువ్వులతో నిరసన తెలిపారు. ప్రతిపక్షంగా అది వారి బాధ్యత. నగర పాలనకు కీలకమైన బడ్జెట్‌ ఆమోదం పొందే విషయంలో అధికార పార్టీ సభ్యుల తీరు క్షమార్హం కాదు. తమ వ్యవహార శైలిపై వారు పునరాలోచించుకోవలసిన అవసరం ఎంతైనా ఉంది. తమ డిమాండ్‌పై పార్టీ అధిష్ఠానం మూడు రోజుల్లోగా స్పందించకపోతే రాజీనామాలు చేస్తామన్న కార్పొరేటర్లు అందుకు తాము సిద్ధంగా ఉన్నామా? అన్న విషయాన్ని గుండెల మీద చెయ్యి వేసుకుని ఆత్మపరిశీలన చేసుకోవలసిన అవసరం ఉంది. ఈ పరిణామాలను ప్రజలు గమనిస్తూనే ఉంటారన్న విషయాన్ని గుర్తెరగాలి…. తస్మాత్‌ జాగ్రత్త !!

ఈ సంబరాలు ఆత్మహత్యాసదృశ్యమే !

జి.కె. వార్తా వ్యాఖ్య
 ఎన్నికలు జరిగిన ఐదు రాష్ట్రాల్లో సాధించిన విజయాలతో భారతీయ జనతా పార్టీ శ్రేణులు ఢిల్లీ నుంచి గల్లీ వరకు సంబరాల్లో మునిగితేలుతున్నాయి. ఐదు రాష్ట్రాల్లో ముఖ్యంగా ఉత్తరప్రదేశ్‌, ఉత్తరాఖండ్‌ రాష్ట్రాల్లో భాజపా తిరుగులేని విజయాలను నమోదు చేయడంతో పాటు గోవా, మణిపూర్‌లో ఇతర పార్టీల, ఇండిపెండెంట్ల సహకారంతో ప్రభుత్వాలు ఏర్పాటు చేయడానికి సన్నద్ధమవుతుండటంతో ఆ పార్టీ శ్రేణుల్లో ఆనందానికి అవధుల్లేకపోవడం సహజమే. ఈ ఫలితాలతో ప్రధాని నరేంద్రమోడీ కొత్త శకానికి నాంది పలికారని, మణిపూర్‌ వంటి మారుమూల రాష్ట్రంలో కూడా పార్టీ జీరో స్థాయి నుంచి అధికార పీఠానికి చేరువకు చేరుకునేలా చేయడం వెనుక మోడీ సమ్మోహనశక్తి ఉందని చాలా మంది భాజపా నాయకులు, భక్తులు దేశాధినేతను కీర్తిస్తున్నారు. అంతవరకు బాగానే ఉంది. ఎవరి పార్టీ రథసారథికి, జన్మోహనశక్తికి కేంద్ర బిందువుగా ఉన్న వారికి ఆ పార్టీ శ్రేణులు భజన చేయడం సహజ పరిణామమే….ఇందులో ఎవరికీ అభ్యంతరం లేదు కాని  కొంతమంది హస్తిన అమాత్యులు, నాయకులు మాత్రం అత్యుత్సాహంతో ఈ అద్భుత ఫలితాలతో పెద్ద నోట్ల రద్దుకు ప్రజామోదం లభించినట్లయిందని ఓ ఉచిత ప్రకటన చేసిపారేశారు. దేశంలో అతి పెద్ద రాష్ట్రంగా, హస్తినలో ఏ పార్టీ అధికారపీఠాన్ని అధి¸ష్ఠించాలన్న కీలకమయ్యే యూపీలో ఎగ్జిట్‌ పోల్స్‌, రాజకీయ పరిశీలకుల అంచనాలను తలక్రిందులు చేస్తూ భాజపా భారీ విజయాలను నమోదు చేసినమాట వాస్తవమే. అయితే యూపీలో భాజపా భారీ విజయానికి చాలా కారణాలే పనిచేశాయి. యూపీ ఓటర్లు యువకుడైన  అఖిలేష్‌ యాదవ్‌కుకు వ్యక్తిగతంగా మద్ధతు ప్రకటించినా ఎన్నికల ప్రకటన వెలువడే వరకు సమాజ్‌వాదీ పార్టీ అధినేత ములాయంసింగ్‌ కుటుంబంలో కలహాలు, పార్టీలో ఐక్యత లోపించడం, కుల,మత సమీకరణలు తదితర కారణాల వల్ల ఆ పార్టీ చావు దెబ్బతింది. అదే సమయంలో యూపీ,ఉత్తరాఖండ్‌ తదితర రాష్ట్రాల ఎన్నికలు భాజపాకు చావోరేవో అన్నట్లు ప్రధానమంత్రి హోదాలో ఉన్న నేత గల్లీ గల్లీకి తిరగడం బహుశ ఇదే ప్రథమం కావచ్చు. ఏమైనా  మోడీ శ్రమకు తగ్గ ఫలితం లభించి నెహ్రూ, ఇందిరాగాంధీల హయాం తర్వాత యూపీలో ఒకే పార్టీకి 300కు పైగా స్థానాలు దక్కించిపెట్టిన ధీరునిగా చరిత్రలో ఆయన నిలిచిపోతారు. అలాగే ఒకప్పుడు ఉత్తరప్రదేశ్‌లో అంతర్భాగంగా ఉండి ప్రత్యేక రాష్ట్రంగా వేరుపడిన ఉత్తరాఖండ్‌లో కూడా కాంగ్రెస్‌ పార్టీ ప్రభుత్వంపై అక్కడి ప్రజలు విసుగుచెందడంతో సహజంగానే  మోడీ సమ్మోహన శక్తి  పనిచేసింది. ఇక పంజాబ్‌లో సంగతి తెలిసిందే. అక్కడ దశాబ్ధకాలంగా అధికారంలో ఉన్న  అకాలీదళ్‌-బిజెపి  సంకీర్ణ ప్రభుత్వం పనితీరుతో విసుగెత్తిన ప్రజలు ఆప్‌ను కాదని కాంగ్రెస్‌కు పట్టంకట్టారు. అలాగే గోవాలో భాజపా ప్రభుత్వ పనితీరుపై విసుగుచెందిన ప్రజలు ఆ పార్టీని తిరస్కరించడంతో అధికారానికి దగ్గరలోనే ఆగిపోవలసి వచ్చింది. అయితే ఇతరుల సహకారంతో గోవాలో,  కొత్తగా మణిపూర్‌లో ప్రభుత్వం ఏర్పాటుకు భాజపా  ఇతరుల సహకారంతో సర్కార్‌ ఏర్పాటుకు ప్రయత్నాలు చేస్తోంది. అయితే ఈ వాస్తవాలను మరిచి గోవా, మణిపూర్‌లో కూడా మాదే విజయం అన్నట్లు భాజపా నేతలు  చంకలు గుద్దుకుంటే ఆత్మవంచనే అవుతుంది.  అయితే ఈ విజయోత్సాహంతో భాజపా నేతలు ఒంటెద్దు పోకడలతో ముందుకు వెళితే దెబ్బతినడం ఖాయం. ముఖ్యంగా భాగస్వామ్య పక్షాల పాలన కొనసాగుతున్న రాష్ట్రాల్లో ఆ పార్టీ తన నిబద్ధతను నిలబెట్టుకోవలసిన అవసరం ఉంది. తెదేపా-భాజపా ఏలుబడి ఉన్న ఆంధ్రప్రదేశ్‌లో విభజన చట్టం అమలు విషయంలో, ఎన్నికల్లో ఇచ్చిన ప్రత్యేక హోదా హామీ అమలు విషయంలో భాజపా నాయకత్వంలోని కేంద్ర ప్రభుత్వం తగిన న్యాయం చేయలేదన్న భావన జనబాహుళ్యంలో బలపడింది. అయితే ఈ వాస్తవాలు మరిచి ఆ పార్టీ ఈ రాష్ట్రంలో ఇంకా బలపడదామనుకుంటే అత్యాశే అవుతుంది. తాజా విజయం భాజపాకు తలకెక్కకుండా ఉంటేనే ఆ పార్టీకి శ్రేయస్కరం. ఈ విజయాలు తమ విధానాలకు, నిర్ణయాలకు  ప్రజామోదం అనుకుంటే పొరపాటే. విశాల భారతదేశంలో ఏదో మూల ఏవో ఎన్నికలు జరుగుతూనే ఉంటాయి. ఎన్నికలు జరిగిన చోట్ల స్ధానిక అంశాలతో పాటు అక్కడి ప్రభుత్వాల వ్యతిరేకత కూడా ప్రత్యర్ధి పార్టీలకు సానుకూలమవుతుందన్న  విషయం జాతీయ పార్టీ నాయకులైన కమలనాథులకు తెలియని విషయమేమీ కాదు. నల్లధనాన్ని అరికట్టే చర్యల్లో భాగంగా తీసుకున్న పెద్ద నోట్ల రద్దు నిర్ణయానికి తాజా ఎన్నికల ఫలితాలు సానుకూలత తెలియజేస్తున్నాయని భాజపాలో చోటామోటా నేతలు అన్యోపదేశంగా చెబుతుండటం చూస్తే నోట్ల రద్దు  కష్టాలు 50 రోజుల్లో తీరుతాయని, వచ్చే రోజులన్నీ ‘అచ్ఛా దిన్‌’లేనని  చెప్పిన వారు 50 కాదు కదా 120 రోజులైనా తీరకపోవడానికి ఏం సమాధానం చెబుతారు. ఈ ‘అచ్ఛా దిన్‌’ కాస్త ‘చచ్చే దిన్‌’గా మారిందని వస్తున్న వ్యాఖ్యలు ఈ పరిస్థితుల్ని చూస్తే నిజమేననిపిస్తోంది. పెద్ద నోట్ల రద్దుతో నల్లధనం ఎంతవరకు అదుపులోకి వచ్చిందో అందరికీ బాగా తెలుసు. మరో వైపు నకిలీ కరెన్సీ ప్రవాహానికి అడ్డుకట్ట పడలేదు. మన జిల్లాయే అందుకు ఉదాహరణ.  ఈ పరిస్థితులన్నీ చూస్తే అచ్ఛా దిన్‌ వచ్చిందో లేదో అందరికీ తెలుసు.  ఏది ఏమైనా నోట్ల రద్దు నిర్ణయానికి తాజా ఎన్నికల ఫలితాలు ఆమోదం అనుకుంటే ఆత్మహత్యాసదృశ్యమే అవుతుందన్న విషయాన్ని కమలనాథులు గ్రహిస్తే వారికే మంచిది.

కథ మళ్ళీ మొదటికి……

జి.కె. వార్తా వ్యాఖ్య
ప్రతి నిర్ణయం వెనుక ఓ పరమార్ధం, లక్ష్యం ఉంటాయి….ప్రతి సగటు జీవి ఈ దిశగా ఆలోచించే నిర్ణయాలు తీసుకుంటారు…. అందులో వారు సఫలీకృతం కావడమనేది వారి వేసే అడుగులపై ఆధారపడి ఉంటుంది…. అయితే ఆ పయనంలో సదరు వ్యక్తులు ఒడిదుడుకులు ఎదుర్కొన్నా, లక్ష్యాన్ని చేరుకోలేకపోయినా ఆ ప్రభావం ఆ వ్యక్తికే లేదా ఆ కుటుంబానికే పరిమితమవుతుంది. అయితే ఒక పాలకుడు తీసుకున్న నిర్ణయం దేశ భవిష్యత్తును, కోట్లాది మంది ప్రజల జీవితాలను ప్రభావితం చేస్తుందనడంలో ఎలాంటి సందేహం లేదు. పెద్ద నోట్ల రద్దు నిర్ణయం విషయంలో ఇపుడు అదే జరుగుతోంది. కొందరి చేతుల్లో కేంద్రీకృతమైన సంపదను ముఖ్యంగా దేశ, విదేశాల్లో మూలుగుతున్న నల్లధనాన్ని వెలికితీసి పేదలకు పంచాలన్న సముచిత ఆలోచనతో ప్రధానమంత్రి నరేంద్రమోడీ గత ఏడాది నవంబర్‌ 8న రూ.500, రూ.1,000 నోట్లను తక్షణమే రద్దు చేస్తున్నట్లు ప్రకటించారు. జన జీవనాన్ని అతలాకుతలం చేసిన ఈ సంచలన నిర్ణయంతో జనం పడ్డ కష్టాలు అన్నీ ఇన్నీ కావు. ఆ సమయంలో లింగ, వయో భేదం లేకుండా ప్రతి వ్యక్తి  బ్యాంక్‌ల ముందు క్యూలు కట్టి పాత పెద్ద నోట్లను జమచేశారు. అయితే  ప్రజల అవసరాలకు అనుగుణంగా కొత్త నోట్లను, చెలామణిలో ఉన్న నోట్లను ముద్రించి సరఫరా చేయడంలో రిజర్వ్‌ బ్యాంక్‌ విఫలం కావడంతో  బ్యాంక్‌ల నుంచి తమ అవసరాలకు తగినంతగా ఖాతాల నుంచి సొమ్ము విత్‌ డ్రా చేసుకోవడానికి పడిన పాట్లు అన్నీ ఇన్నీ కావు. అయినా దేశాధినేత (ప్రధానమంత్రి) తీసుకున్న నిర్ణయాన్ని గౌరవించి, దాని వల్ల భవిష్యత్‌లో పెద్ద ప్రయోజనమే ఉంటుందని భావించి ప్రతి వ్యక్తి పంటి బిగువున ఆ బాధలన్నింటిని ‘అచ్ఛా దిన్‌’ కోసం భరించారు. ఆ సమయంలో ప్రధానమంత్రి ఓ మాట అన్నారు….నోట్ల రద్దు కష్టాలు 50 రోజులేనని, ఆ తర్వాత ఎవరికీ కరెన్సీ కష్టాలు ఉండవని, బ్యాంక్‌ ఖాతాల్లో ప్రభుత్వం విధించిన పరిమితికి మించి జమ అయిన మొత్తాల నిగ్గు తేల్చి ఆ సొమ్మును పేదలకు పంచుతామని ప్రకటించారు. ఆ సమయంలో ప్రధాని చెప్పిన మాటలు పేదలకు పన్నీటి జల్లులా అనిపించాయి. అయితే 50 రోజులు కాదు కదా 120 రోజులు (నాలుగు నెలలు) అయినా ప్రజల కష్టాలు ఎంత మాత్రం తీరలేదు. పైగా కథ మళ్ళీ మొదటికి వచ్చిం ది. దీంతో పెద్ద నోట్ల రద్దు నిర్ణయం పరమార్ధం మాత్రం నెరవేరలేదనే చెప్పవచ్చు. నల్లధనం బహిర్గతం కాకపోగా ప్రజలకు కష్టాలు మాత్రం మిగిలాయి. ఇలా ఉండగా కరెన్సీ కష్టాలు మాత్రం ముగిసినట్టే ముగిసి మళ్ళీ మొదలయ్యాయి. డిసెంబర్‌ వరకు పాత పెద్ద నోట్లు జమ చేసుకోవడంతో సరిపోగా ఆ సమయంలో కొత్త నోట్లు, రూ. 100, రూ. 50 వగైరా కరెన్సీ పొందడానికి అష్టకష్టాలు పడవలసి వచ్చింది. చాలా బ్యాంక్‌లు తమ ఖాతాదారులకు కొత్తగా ముద్రించిన రెండు వేల రూపాయల నోట్లను చేతిలో పెట్టడంతో  ఆ  నోటుకు బయట చిల్లర లభ్యం కాక చేతిలో డబ్బులు ఉన్నా అవసరం తీరక బాధ పడ్డారు. బ్యాంక్‌ ఖాతాల్లో సొమ్ము ఉన్నా విత్‌ డ్రాలపై పరిమితులతో అవసరాలకు అనుగుణంగా సొమ్ము పొందలేకపోయారు. ఇలా ఫిబ్రవరి మధ్య వరకు ప్రజలు తీవ్ర ఇబ్బందులు పడ్డారు.  అదే సమయంలో నగదు రహిత లావాదేవీలను పెద్ద ఎత్తున ప్రోత్సహించాలని కేంద్ర ప్రభుత్వం నిర్ణయించింది. డిజిటల్‌ లావాదేవీల నిర్వహణపై తగు సూచనలు, సలహాలు ఇచ్చేందుకు మన ముఖ్యమంత్రి నారా చంద్రబాబునాయుడు నేతృత్వంలో ఓ కమిటీని కూడా ఏర్పాటు చేసింది. ఆ కమిటీ ఇప్పటికే కొన్ని సిఫార్సులు చేసింది.  నగదు రహిత లావాదేవీల ప్రోత్సాహానికి  కేంద్రం కొన్ని చర్యలు కూడా చేపట్టింది. అయితే ప్రపంచంలోనే అగ్ర రాజ్యంగా ఉన్న అమెరికా తదితర దేశాల్లోనే ఇంకా పూర్తి స్థాయిలో నగదు రహిత లావాదేవీలు జరగకపోగా నిరక్ష్యరాస్య భారతావనిలో అదేలా సాధ్యమవుతుందనే సందేహం వ్యక్తమవుతోంది. ఆ దిశగా ప్రజల్ని కార్యోన్ముఖుల్ని చేయడం సమంజసమే అయినా ఖచ్చితం చేయడం మాత్రం ఇప్పట్లో సాధ్యం కాదన్న విషయం మన పాలకులకూ తెలుసు. అయితే కొన్ని సంస్థలు, చివరకు కొన్ని రైతు బజార్లలో, పెట్రొల్‌ బంక్‌ల్లో  స్వౖౖెపింగ్‌ యంత్రాలను ప్రవేశపెట్టి నగదు రహిత లావాదేవీల వైపు ప్రజల్ని ప్రోత్సహించేందుకు చర్యలు చేపట్టారు. కాగా పెద్ద నోట్ల రద్దు తర్వాత పరిస్థితులు కాస్త కుదుటపడటంతో హమ్మయ్య అని ఊపిరి పీల్చుకుంటున్న తరుణంలో తాజాగా కరెన్సీ కష్టాలు మళ్ళీ మొదలయ్యాయి. బ్యాంక్‌ల నుంచి, ఏటీఎంల నుంచి నగదు ఉపసంహరణ పరిమితులను సడలించడంతో పాటు రిజర్వ్‌ బ్యాంక్‌ నుంచి క్షేత్రస్థాయి బ్యాంక్‌లకు నగదు రాక తగ్గిపోవడంతో ఇబ్బందులు తీవ్రమయ్యాయి. దీంతో   చాలా చోట్ల ఏటీఎంల్లో నగదు నిల్వలు నిండుకోవడంతో ఖాతాదారులు తీవ్ర ఇబ్బందులు పడుతున్నారు. అన్ని బ్యాంక్‌ల ముందు నో క్యాష్‌  బోర్డులు సాక్షాత్కరిస్తున్నాయి. ఇపుడిపుడే నగదు ఉప సంహరణ పరిమితులను సడలించిన బ్యాంక్‌లు నగదు కొరతతో మళ్ళీ ఆంక్షల్ని బిగిస్తున్నాయి. ఓ వైపు నెల ప్రారంభరోజులు కావడంతో వేతనాలు, ఫించన్ల పంపిణీ ఇతర అవసరాలకు భారీగా నగదు అవసరమవుతోంది. పోనీ నగదు రహిత లావాదేవీలు చేద్దామంటే  పన్నుల భారాలు వినియోగదారులను ఆ దిశగా ముందడుగు వేయనీయడం లేదు. రిజర్వ్‌ బ్యాంక్‌ నుంచి బ్యాంక్‌ శాఖలకు నగదు రాక బాగా తగ్గిపోవడం, దీనికి తోడు బ్యాంక్‌ల నుంచి వెళతున్న సొమ్ము తిరిగి  చేరకపోవడంతో నగదు కొరత పెరిగిపోయి మళ్ళీ కరెన్సీకి కటకటలాడవలసిన పరిస్థితి ఏర్పడింది. ఏదైనా కొనుగోలు చేద్దామంటే మన దగ్గర అంత సొమ్ము ఉందా? లేదా? అని సంశయిస్తాం…. అయితే ఇపుడు అందుకు భిన్నమైన పరిస్థితి నెలకొంది. కళ్ళెదురుగా వస్తువున్నా, ఆ వస్తువు అవసరం మనకున్నా కొనుగోలు చేద్దామంటే మన జేబులో తగినంత సొమ్ము లేకపోవడం విచిత్రం. నగదు ఉపసంహరణపై ఆంక్షలు విధించడం ఆందోళన కలిగిస్తోంది. బ్యాంకుల్లో జమ చేసుకున్న తమ సొమ్మును ఎప్పుడు అప్పుడు తీసుకునే స్వేచ్ఛ ఖాతాదారులకు ఉంటుంది.  అయితే ఆ విత్‌డ్రాలపై ఆంక్షలతోపాటు పరిమితికి మించి చేస్తే ఛార్జీలు వసూలు చేస్తామనడం ఎంతమాత్రం సమంజసం కాదు.  అలాగే ఎక్కౌంట్లలో కనీస బ్యాలెన్స్‌లు నిర్వహించకపోతే జరిమానాలు విధించాలని బ్యాంక్‌ల దిగ్గజం ఎస్‌బిఐ యోచించడం పూర్తిగా అసమంజసం. ఇటువంటి చర్యలు ప్రజలను బ్యాంక్‌లకు చేరువ చేయడం మాట అటుంచి బ్యాంక్‌లంటే భయపడే పరిస్థితి ఏర్పడుతుంది. ఇటువంటి విషయాలపై కేంద్ర ప్రభుత్వం, రిజర్వు బ్యాంక్‌ దృష్టిసారించి సరిదిద్దితేనే  ప్రజల కష్టాలు  తీరుతాయి.

జల్లికట్టుకు జై అంటున్నవారు సతీ సహగమనాన్నీ సమర్ధిస్తారా?

(జి.కె.వార్తా వ్యాఖ్య)
జల్లికట్టు…..నేడు జనం నోళ్ళలో నానుతున్న మాట ఇది….. తమిళనాట ఏటా జనవరి మాసంలో నాలుగు రోజులు జరుపుకునే సంక్రాంతి వేడుకల్లో భాగం ఈ జల్లికట్టు. వ్యవసాయం ఫలప్రదం కావడానికి దోహదపడే ఎడ్లకు కృతజ్ఞతులు చెబుతూ వాటిని ఆలింగనం చేసుకునే వేడుకగా మొదలై, ఎడ్ల మధ్య పోటీగా మారి, అనంతరం పశువుకీ, మనిషికీ మధ్య పోటీగా ఇది రూపాంతరం చెందింది. పూర్వం ఎద్దు కొమ్ములకు  బంగారు తొడుగులు తొడిగి ఎద్దును ధైర్యంగా ఎదిరించి కొమ్ములు వంచి  వాటిని తీసుకున్నవారిని ధీరులుగా గుర్తించేవారు. అయితే రాన్రాను ఎద్దును రెచ్చగొట్టడం, హింసించడం ఎక్కువ కావడంతో జంతు ప్రేమికులు ఈ క్రీడను నిషేధించాలంటూ కోర్టుకు వెళ్ళగా 2014లో సుప్రీంకోర్టు దీనిని నిషేధించింది. ఆ తర్వాత కొన్ని మార్పులతో జల్లికట్టు వంటి క్రీడను అనుమతిస్తూ కేంద్ర అడవులు,పర్యావరణ శాఖలు ప్రకటనలు జారీ చేశాయి. అయితే దీనిని కొన్ని సంస్ధలు వ్యతిరేకిస్తూ న్యాయస్థానాన్ని ఆశ్రయించగా ఈ  నెల 16న సుప్రీంకోర్టు కేంద్ర ప్రభుత్వ శాఖల ప్రకటనలపై స్టే ఇచ్చింది. కావాలంటే కంప్యూటర్‌లో ఎద్దులతో కుస్తీ పట్టే ఆటలు ఆడుకోండి…ఎద్దులను హింసించడం ఎందుకు? అంటూ కేసు విచారణ దశలో సుప్రీంకోర్టు వ్యాఖ్యానించింది కూడా. జల్లికట్టుకు సుప్రీంకోర్టు అనుమతిని నిరాకరించడంతో తమిళనాట మొదలైన ప్రజా ఉద్యమం విస్తృత రూపం దాలుస్తుండటంతో అక్కడి పాలక, ప్రతిపక్షాలు ఏకమై చివరకు తాము అనుకున్నది సాధించగలిగాయి.  తమిళ ప్రజలు దేశం పట్ల జాతీయ భావన కంటే తమ ప్రాంతం పట్ల నిబద్ధతను ఎక్కువ ప్రదర్శిస్తారన్న విషయం అందరికీ తెలిసిందే. అనాదిగా వస్తున్న తమ సంస్కృతి, సంప్రదాయాలకు భంగం వాటిల్లుతోందంటూ తమిళనాట పాలక, ప్రతిపక్షాలే గాక సినీ, రాజకీయ ప్రముఖులు, విద్యార్ధి,యువజన లోకం ఇలా ఒకరేమిటీ అబాల గోపాలం ఏకమై మెరీనా తీరాన గర్జించాయి. విద్యార్ధి, యువజనులు ప్రారంభించిన ఈ ఉద్యమం ఉధృతరూపం దాల్చడంతో అందరూ పోటీ పడి మరీ భాగస్వాములయ్యారు. దీంతో దేశమంతా ముఖ్యంగా దక్షిణాదిన సమస్యలన్నీ పక్కకుపోయి ఇదే హాట్‌ టాఫిక్‌గా మారింది. చివరకు ప్రపంచ సంగీత చక్రవర్తి, ఆస్కార్‌ అవార్డు గ్రహీత ఏ ఆర్‌ రెహ్మాన్‌ కూడా ఒకరోజు నిరాహారదీక్ష చేశారు. చివరికి ఈ విషయం ఎలా మారిందంటే జల్లికట్టు వ్యవహారంలో ముందుకు వెళ్ళకపోతే ఎక్కడ వెనకబడిపోతామోనన్న భయాందోళనే వారినందరినీ ఏకోన్ముఖుల్ని చేసింది.  జల్లికట్టుకు అనుమతి ఇవ్వడం వంటి అంశం ఉమ్మడి జాబితలో ఉన్న కారణంగా కేంద్ర ప్రభుత్వ అనుమతి అవసరం. మొత్తం మీద తమిళుల ఉద్యమం, రాయబారాలు ఫలించాయి. తమిళుల ప్రాచీన సంస్కృతి, సంప్రదాయమంటూ  అక్కడ వారంతా జల్లికట్టును సమర్ధించారు. అలాగే వారి ఒత్తిడికి కేంద్రం తలొగ్గింది. ఫలితంగా తమిళ సర్కార్‌ ఆర్డినెన్స్‌కు ఆ రాష్ట్ర గవర్నర్‌ వెంటనే ఆమోదం తెలపడం, రాష్ట్ర ప్రభుత్వ నిర్ణయానికి కేంద్రం తక్షణమే గ్రీన్‌ సిగ్నల్‌ ఇవ్వడం, ఆ మరునాడే అంటే నిన్న జల్లికట్టును అధికారికంగా ప్రారంభించడం అన్నీ చకా చకా జరిగిపోయాయి. జంతు హింసతో పాటు ప్రజల ప్రాణాలకు ముప్పు ఉన్న ఈ క్రీడపై అందరిలో ఉన్న భయాలను నిజం చేస్తూ  నిన్న ప్రారంభమైన జల్లికట్టులో ఇద్దరు ప్రాణాలు కోల్పొవడం, అనేక మంది గాయపడటం జరిగింది. తమిళనాట జల్లికట్టు వ్యవహారాన్ని ప్రస్తావించుకున్నప్పుడు మన ఆంధ్రప్రదేశ్‌లో కోడి పందేల గురించి కూడా ప్రస్తావించుకోవలసిన అవసరం ఉంది. బొబ్బిలి రాజుల కాలం నుంచి వస్తున్న ఈ కోడి పందేలపై చాలా ఏళ్ళుగా నిషేధం విధించారు. కక్షలు, కార్పణ్యాలను పెంచడంతో పాటు కుటుంబాలను ఆర్ధికంగా తీవ్రంగా దెబ్బతీసే జూద క్రీడ వంటి కోడి పందేలకు కూడా న్యాయస్థానం అనుమతి నిరాకరించినా మొన్న సంక్రాంతి పండుగ రోజుల్లో ఈ పందేలు యదేచ్ఛగా జరిగాయి. చట్టం అమలు చేయవలసిన ప్రభుత్వ యంత్రాంగం ఆ మూడు రోజులు కళ్ళు మూసుకుని తెలిసి తెలియనట్టుగా వ్యవహరించింది.  ఏమైనా అంటే సంస్కృతి సంప్రదాయం అంటున్నారు. జల్లికట్టు ప్రాచీనంగా రెండు వేల సంవత్సరాల నుంచి వస్తున్న క్రీడగా చెబుతుండగా తమిళ వాజ్ఞ్మయంలో దీనిని ‘ఎరుతలవడై’ (ఎద్దును కౌగిలించుకోవడం)గా వ్యవహరిస్తారని చెబుతుంటారు. ఆ తర్వాత కాలంలో 400 సంవత్సరాల నుంచి ఒక వధువు కోసం చాలా మంది పోరాడితే ఆ వధువుని పెళ్ళాడేందుకు ఎంపిక చేసే వరుల మధ్య నిర్వహించే ఎద్దుల పోటీ జల్లికట్టుగా రూపాంతరం చెందిందని కూడా చెబుతారు.  ఆ తర్వాత కాలంలో ఇది రాక్షస క్రీడగా మారింది. ఎప్పుడో 200, 400 సంవత్సరాల చరిత్ర కలిగిన జల్లికట్టును నిలబెట్టుకోవడానికి అండదండలందించడం సమంజసమని భావిస్తే రామాయణ, మహాభారతాల నాటి కాలంలో  సతీ సహగమనం ఉందని  చెప్పి నేటి ఆధునిక సమాజంలో ఆ సాంఘిక దురాచారాన్ని  సమర్ధిస్తారా? అన్న విషయానికి సమాధానం చెప్పవలసిన అవసరం ఉంది. ప్రజల్లో సెంటిమెంట్‌ను రెచ్చగొట్టి తమ పబ్బం గడుపుకుందామనుకునే వారికి  భవిష్యత్‌లో ప్రజా జీవితంలో ఎదురయ్యే సమస్యలు ఎంతమాత్రం పట్టబోవు. ఏది ఏమైనా ‘మేం బాగుంటే చాలు’ అనే భావనతో పాలకులు, రాజకీయ పార్టీలు వ్యవహరిస్తే భవిష్యత్‌లో సాంఘిక దురాచారాలు కూడా తిరిగి పడగవిప్పే ప్రమాదం లేకపోలేదు. జయలలిత మరణానంతరం తమిళనాడు రాజకీయాల్లో ఏదో విధంగా కాలిడి అక్కడ ఖాతా తెరవాలని ఉవ్విళ్ళూరుతున్న కమలనాథులకు సారధ్యం వహిస్తున్న మన దేశ ప్రధాని నరేంద్రమోడీ కూడా జల్లికట్టు అంశాన్ని ఓ ఆయుధంగా వినియోగించుకోవాలని ప్రయత్నించడం నిజంగా బాధాకరం. జల్లికట్టుకు అనుమతిచ్చే ఆర్డినెన్స్‌ జారీ వెనుక నీతి కబుర్లు చెబుతూ ఉక్కు మనిషిగా అభివర్ణింపబడుతున్న  మన ప్రధానమంత్రి నరేంద్రమోడీ సహకారం ఉందని కొందరు చెప్పుకోవడం ఓటు బ్యాంక్‌ రాజకీయాలు చేయడమే.  సంస్కృతిని,సంప్రదాయాలను, భాషను కాపాడుకోవాలనుకోవడం తప్పు లేదు కాని జంతు హింసకు పాల్పడుతూ మనుషుల ప్రాణాలకు ముప్పు తెచ్చే ఈ జల్లికట్టును సమర్ధించడం మాత్రం తప్పు. జల్లికట్టును ఆడాలనుకునేవారు  ఎడ్లను హింసించకుండా దేశవాళీ పశుసంపద వృద్ధి కావడానికి వీలుగా ఈ క్రీడను మలుచుకోవాలి.

ఈ తీర్పు మార్పుకు శ్రీకారం చుడుతుందా ?

(జి.కె. వార్తా వ్యాఖ్య )
 కుల,మతాల ప్రాతిపదికగా ఓట్లడగటం చట్ట విరుద్ధమంటూ భారత సర్వోన్నత న్యాయస్ధానం సుప్రీంకోర్టు నిన్న చారిత్రక తీర్పును వెలువరించింది. రాజ్యాంగ విరుద్ధంగా కుల, మతాలతో పాటు జాతి, వర్గం, భాష  ప్రాతిపదికన ఓట్లేయాలంటూ అడిగే ఏ విజ్ఞప్తి అయినా ఎన్నికల నిబంధనావళి ప్రకారం అవినీతి కిందకే వస్తుందని, ఆ విధంగా ఓట్లడిగి గెలిచిన వారు అనర్హులవుతారని హెచ్చరించడం శతధా అభినందనీయం. ఎన్నికల ప్రక్రియను ఇరకాటంలోకి నెట్టేసే ఇలాంటి చర్యలు చట్టవిరుద్ధమని అత్యున్నత న్యాయస్ధానం  తేల్చి చెప్పింది. వ్యక్తికి, దేవుడికి మధ్య సంబంధం వ్యక్తిగత ఇష్టాఇష్టాలతో కూడుకున్నదే కానీ ప్రభుత్వం లేదా పాలకులతో దీనికి సంబంధం లేదని అత్యున్నత న్యాయస్ధానం వ్యాఖ్యానించడం ముదావహం. రాజకీయ పార్టీల ఓటుబ్యాంక్‌ రాజకీయాలతో లౌకికవాద పునాది బలహీనపడుతున్న తరుణంలో సుప్రీంకోర్టు చారిత్రాత్మక తీర్పును వెలువరించింది. అటువంటి వాటికి పాల్పడితే  అనర్హతకు గురవుతారని హెచ్చరించడం ఆహ్వానించదగ్గ పరిణామం.   వర్తమాన రాజకీయాలన్నీ కులం, మతం అనే చట్రంలో కొనసాగుతున్నాయి. లౌకిక ప్రధాన ప్రాతిపదికన పునాదులు వేసుకున్న భారత రాజ్యాంగ వ్యవస్ధలో  ముఖ్యంగా ఎన్నికల విధానంలో కుల, మతాలు, ప్రాంతీయ ధోరణులు ఆందోళనకర స్థాయిలో ప్రబలాయి. కుల,మత శక్తులతో జతకట్టి రాజకీయాలు చేయడం ఎంత ప్రమాదకరమైనవో గత అనుభవాలే చాటుతున్నాయి. కుల,మత, వర్గ, ప్రాంత, భాష ప్రాతిపదికన  ప్రజల్ని విభజించి అధికారమే పరమావధిగా వ్యవహరించే రాజకీయ పార్టీలు ఇకనైనా తమ ధోరణి మార్చుకోవాలని అత్యున్నత న్యాయస్ధానం తీర్పు హెచ్చరిస్తోంది.  ప్రతి విషయాన్ని కుల సమీకరణ తూకం తూసే పార్టీలకు ఈ తీర్పు కనువిప్పు కావాలి. ‘మేము ఫలాన కులం కాబట్టి మా కులం కోటాలో మాకు రాజకీయ పదవులు కేటాయింపుల్లో ప్రాధాన్యత కావాలని డిమాండ్‌ చేయడాన్ని కూడా శిక్షార్హం చేయాలి. కులాల, మతాల సమీకరణలో, కేటాయింపుల్లో ప్రతిభావంతులు కనుమరుగవుతూ అనర్హులు అందలాలు ఎక్కుతున్న ప్రస్తుత రాజకీయ వ్యవస్థ తీరు మార్పుకు ఈ తీర్పు శ్రీకారం చుడుతుందని ఆశిద్దాం.  దేశ వ్యాప్తంగా  కుల మత వర్గ ఓటు బ్యాంక్‌ల దన్నుతో రాజకీయ రంగాన్ని శాసిస్తున్న పార్టీలు కొత్త నిబంధనావళికి ఎలా కట్టుబడుతాయో వేచి చూడాల్సిందే. నిజాయితీ, ఉదారత, ప్రజా బాహుళ్యంలో సానుకూలత ఉన్నా కుల, మత, ధన ప్రభావంతో రాజకీయాల్లో నిలదొక్కుకోవడానికి ప్రయాస పడుతున్న వారికి సుప్రీం తీర్పు కాస్త ఊరటనిస్తుంది. దేశంలో అతి పెద్ద రాష్ట్రం ఉత్తరప్రదేశ్‌తో సహ ఎన్నికలు జరగనున్న ఐదు రాష్ట్రాల అసెంబ్లీ ఎన్నికల వేళ సుప్రీం తీర్పు ఏ మేరకు ప్రభావాన్ని, ఫలితాన్ని చూపుతుందో చూద్దాం మరి.