అప్ డేట్ అయితేనే కాంగ్రెస్ కు భవిష్యత్తు! (శనివారం నవీనమ్)

అప్ డేట్ అయితేనే కాంగ్రెస్ కు భవిష్యత్తు!
(శనివారం నవీనమ్)

సామాన్య ప్రజానీకంలో పెరుగుతున్న చైతన్యాల కంటే రాజకీయ పార్టీల వైఖరులు వెనుకబడి పోతున్నట్టు వున్నాయి. ఇందులో అప్ డేట్ అయిన పార్టీలే ముందుంటాయి. మతతత్వ వ్యతిరేక సెక్యులరిజం పార్టీ లైన్ గా కాంగ్రెస్ చాలాకాలం బిజెపిని నిలువరించింది. అయితే అధ్వానీ రథ యాత్ర, వాజ్ పాయ్ రాజకీయ ఉదారత్వ స్వభావం కలసి కాంగ్రెస్ సెక్యులరిజం లైన్ ను నిర్వీర్యం చేశాయి.

బిజెపి హిందుత్వ లైన్ మారక పోయినప్పటికీ, నరేంద్ర మోదీ ‘అభివృద్ధి’ నినాదం బిజెపి ముఖ చిత్రంగా మారిపోయింది. పెద్దనోట్ల రద్దు, జి ఎస్ టి అమలు వంటి ప్రయోగాల్లో వైఫల్యాలు బిజెపి ‘ఫేస్’ లో ఆకర్షణను కళా కాంతులను తొలగిస్తున్నాయి. ఇలాంటి స్థితిలో మోదీ ముఖాన్ని పక్కన పెట్టి, యోగీ ఆదిత్యనాధ్ దాస్ వంటి హిందుత్వ ఫేస్ లు ముందుకు వచ్చినా ఆశ్చర్యం వుండదు. బిజెపి లో నరేంద్ర మోదీకి మించిన క్రౌడ్ పుల్లర్ లేకపోయినా కూడా అవసరమైతే ఆయన ఫేస్ మార్చేయగల ‘పరివారం’ బిజెపికి వుంది.

మోదీ చేతిలో చావుదెబ్బతిన్న కాంగ్రెస్ ఇప్పటికీ నాయకత్వం సంక్షోభం నుంచి బయట పడనే లేదు. సోనియా స్ధానంలో పార్టీ సారధ్య బాధ్యతలు స్వీకరించడానికి రాహుల్ గాంధీ ఇపుడిపుడే సిద్ధమవుతున్నారు. ఆయన పార్టీ అధ్యక్షుడు కావడం, సొంత టీమ్ ని రూపొందించుకోవడం ఒక ఎత్తయితే, పార్టీ లైన్ నిర్ధారించుకుని ఆంతర్గత ఆమోదం సాధింకుకోవడం మరో ఎత్తు. వీటన్నిటికీ వ్యవధి తక్కువగా వుంది. అయితే ఆర్థిక వృద్ధి రేటు ఆందోళనకరంగా వుండడం, జిఎస్టీ అమలు పలు చిక్కులకు దారి తీస్తూ వుండడం, ద్రవ్యోల్బణం, ఉపాధి కల్పన లేకపోవడం, బిజెపి రాష్ట్ర ప్రభుత్వాలు అవినీతి ఆరోపణల్లో వుండటమే వినియోగించుకోగలిగితే కాంగ్రెస్ కు పెద్ద అవకాశం.

ఢిల్లీ యూనివర్సిటీ విద్యార్థి సంఘం ఎన్నికలలో నాలుగేళ్ల తరువాత కాంగ్రెస్ విద్యార్థి విభాగం ఘన విజయం సాధించడం, బిజెపికి బలమైన ప్రాంతంగా భావించే గురుదాస్‌పూర్ లోక్‌సభ ఉప ఎన్నికల్లో కాంగ్రెస్ అభ్యర్థి 2 లక్షల ఆధిక్యతతో గెలుపొందడం కాంగ్రెస్‌కు పెద్ద ఆశలు కలిగిస్తున్నాయి.

రాహుల్ గాంధీ సారధ్యంలో కాంగ్రెస్ హిమాచల్ ప్రదేశ్, గుజరాత్‌ అసెంబ్లీ ఎన్నకలను ఎదుర్కోవాల్సి ఉంటుంది. ఆ తరువాత మరో ఎనిమిది రాష్ట్రాల ఎన్నికలు రాబోతున్నాయి. అన్ని చోట్లా నేరుగా బిజెపికి కాంగ్రెస్‌తో తలపడవలసిన పరిస్థితులు నెలకొన్నాయి. గుజరాత్‌లో 20 ఏళ్లుగా కాంగ్రెస్ అధికారంలో లేదు. అక్కడ 12 ఏళ్లపాటు ముఖ్యమంత్రిగా సాధించిన అభివృద్ధిని దేశ ప్రజలకు చూపి, గుజరాత్ మోడల్ పేరుతో నరేంద్రమోదీ ప్రధాని కాగలిగారు. అలాంటి గుజరాత్ లో బి జె పి ని ఓడిస్తే కాంగ్రెస్ కు పూర్వ వైభవం అసాధ్యం కాదు.

బలహీన వర్గాల రక్షణ నినాదం చాలాకాలం పాటు కాంగ్రెస్ కు మరోపేరుగా వుండిపోయింది.
పేదరికం నిర్మూలన నినాదం ఇందిరాగాంధీని జాతీయ నాయకురాలిగా నిలబెట్టింది. అధ్వానీ రధయాత్ర బిజెపిని అధికారంలో కూర్చోబెట్టింది. ప్రజలను నేరుగా స్పృశించే నినాదాలు రూపొందించే సృజనాత్మకత, కమ్యూనికేషన్ టెక్నాలజీలను శక్తివంతంగా వినియోగించుకునే సామర్ధ్యం నరేంద్ర మోదీని బిజెపి తో సరిసమానంగా నిలబెట్టాయి. ఇలాగే, కాల మాన స్ధితిగతులకు అనుగుణంగా అప్ డేట్ కాగలిగితే దేశరాజకీయాల్లో కాంగ్రెస్ ప్రత్యామ్నాయ శక్తిగా మారవచ్చు!

ప్రజల చైతన్యానంతో మ్యాచ్ అయ్యే పార్టీ లైన్ / వైఖరులను ఖరారు చేసుకుని, ప్రజల్లోకి చేరుకోడానికి అధునాతన సాంకేతిక పరిజ్ఞానాన్ని అందిపుచ్చుకోగలిగితే కాంగ్రస్ తిరిగి అధికారంలోకి రావడం అసాధ్యం కాదు. అయితే వచ్చే ఎన్నికల నాటికి ఇది జరుగుతుందా అన్నదే అసలు ప్రశ్న!

 

పోలవరమే పెద్ద ఆశ ఎన్నికల నాటికి సగం పనులైనా అయ్యే ఆవకాశమే లేదు (శనివారం నవీనమ్)

పోలవరమే పెద్ద ఆశ
ఎన్నికల నాటికి సగం పనులైనా అయ్యే ఆవకాశమే లేదు
(శనివారం నవీనమ్)

పోలవరం ప్రాజెక్టులో ఇప్పటివరకు 25 శాతం పనులు పూర్తి అయ్యాయని ప్రాజెక్టు సిబ్బంది ఢల్లీ నుంచి వచ్చిన ఒక అధయాయన బృందానికి చెప్పారు. వాస్తవంగా 18 శాతం మాత్రమే పూర్తయినట్టుగా ఇరిగేషన్ ఇంజనీర్లు కూడా వున్న ఆటీమ్ గుర్తించింది

ముఖ్యమంత్రి చంద్రబాబు ఈ ప్రాజెక్టు నిర్మాణాన్ని సత్వరం పూర్తి చేసి క్రెడిట్ మొత్తం తెలుగుదేశం ప్రభుత్వానికి ఆపాదించాలని ఆశ పడుతున్నారు. క్షేత్రస్థాయిలో అనేక కారణాలతో పనులు వేగవంతంగా సాగడంలేదు. ప్రధానంగా ముంపు గ్రామాల ప్రజలను ఖాళీ చేయించడం, కాలువలకు సంబంధించి భూసేకరణ, రైతులకు, ముంపు బాధితులకు వారు ఆశిస్తున్న స్థాయిలో పరిహారం ఇవ్వడం, ఆ స్థాయిలో వారిని ఒప్పించడం ప్రభుత్వానికి తలనొప్పిగా మారింది. ప్రాజెక్టు నిర్మాణ ప్రాంతానికి కేవలం నాలుగైదు కిలోమీటర్ల దూరంలో నదిఒడ్డున వున్న దేవీపట్నం మండల పరిసర గ్రామాలు ముంపునకు గురి కానున్నాయి. ఇంతవరకు నోటీసులు కూడా రాలేదని వారు ఆటీముకి చెప్పారు. ఇలాగే తెలంగాణ నుంచి ఏపీలో కలసిన కుకునూరు తదితర ఏడు మండలాల్లో కొన్ని ప్రాంతాలు ముంపునకు గురికానున్నాయి. ఆ ప్రాంతంలో చాలావరకు రైతులకు, ముంపు ప్రజలకు పరిహారం చెల్లిస్తున్నారని తెలిసింది. ఇంకా పర్యావరణ అనుమతులు రాలేదని, అయినా ప్రాజెక్టు నిర్మిస్తున్నారని సామాజిక శాస్త్రవేత్త డాక్టర్ పెంటపాటి పుల్లారావు నేషనల్ గ్రీన్ ట్రిబ్యునల్‌లో పిటిషన్ వేసారు. ఈ పిటిషన్ మీద ఇంకా విచారణ కొనసాగుతునే వుంది.

రాక్‌ఫిల్ డ్యాం, ఈసీఆర్ డ్యాం, స్పిల్‌వే, స్పిల్ ఛానల్ రూపాలలో నాలుగు విభాగాలుగా మొత్తం 48 గేట్లతో 1128 మీటర్ల పొడవున ఈ ప్రాజెక్టు నిర్మాణం జరుగుతున్నది. తాజాగా 58,319.06 కోట్లు ఖర్చు అవుతుందని అంచనా వేసారు. ఈ సవరణ నివేదికను 22-08-2017న ఢిల్లీలో రాష్ట్ర జలవనరుల శాఖ అధికారులు కేంద్ర జలసంఘానికి, కేంద్ర జల వనరుల మంత్రిత్వ శాఖకు నివేదిక రూపంలో సమర్పించారు. ప్రధాన పనికి 42,905.78 కోట్లు, ఎడమ కాలువకు 6362. 29కోట్లు, కుడి కాలువకు 4835.33కోట్లు, విద్యుత్ కేంద్రానికి 4205.66 కోట్లు, ఎడమ కాలువ భూసేకరణకు 1401.46 కోట్లు కావాలని కోరారు. గతంలో 2010-11లో సవరించిన అంచనాల ప్రకారం 1610.45 కోట్లుగా అంచనా వేసారు. ఇప్పుడు అది తాజా అంచనాలతో 58 వేలకోట్లకు చేరింది. ఇప్పటివరకు ఇంచుమించు మట్టిని తవ్వే పని చాలావరకు పూర్తి కావచ్చింది. తరువాత కాంక్రీట్ నిర్మాణం చేపట్టాలి. పునాది నుంచి 57.90 మీల ఎత్తుకు నిర్మించాలి. అక్కడ 16మీ.లు+20మీ.లు గేట్లు ఏర్పాటు చేస్తారు.

డ్యాంనుంచి వచ్చే నీటిని కుడి ఎడమ కాలువల్లోకి తీసుకెళ్లేందుకు కొండలు అడ్డంగా వున్నందున సొరంగాల ద్వారా కాలువలు తవ్వుతున్నారు. ఎడమవైపు 918 మీటర్ల పొడవున ఒకటి, 890 మీల పొడవున మరొకటి రెండు సొరంగాలను నిర్మిస్తున్నారు. ఈ ప్రాజెక్టు పూర్తయితే ఉభయ గోదావరి, కృష్ణా జిల్లాల్లో దాదాపు పది లక్షల ఎకరాలకు పైగా సాగునీటి సౌకర్యం లభిస్తుంది. విశాఖ నగరానికి మరియు చుట్టుపక్కల పారిశ్రామిక ప్రాంతాలకు తాగునీటి సౌకర్యం కూడా లభిస్తుంది.
80 టిఎంసిల గోదావరి జలాలను కృష్ణా నదిలోకి కలపడానికి అవకాశం ఏర్పడుతుంది. తద్వారా తరచు కరువుకు గురవుతున్న రాయలసీమకు, అక్కడ నిర్మాణంలో వున్న హంద్రీ నీవా, గాలేరు నగరి ఎత్తిపోతల పథకాలకు సాగునీటి సమస్య కూడా తీరుతుంది. 960 మెగావాట్ల విద్యుత్ ఉత్పత్తి అమల్లోకి రానుండడంతో యావత్ ఆంధ్రప్రదేశ్ రైతులకు, పారిశ్రామిక వేత్తలకు విద్యుత్ కొరత తీరడమే కాక పక్కరాష్ట్రాలకు అమ్ముకోవడానికి అవకాశం ఏర్పడుతుంది.

కాగా దేవీపట్నం, రంపచోడవరం ఏజెన్సీలనందు గిరిజనులకు, గిరిజనేతరులకు భూవివాదాల సమస్య వున్నందున పరిహారం చెల్లింపునందు క్లిష్టతరమైన సమస్యలు ఎదుర్కొనాల్సి వుంది. గిరిజనులకు నక్సల్స్ (మావోయిస్టులు) మద్దతు వున్నందున ఈ సమస్య మున్ముందు శాంతిభద్రతల సమస్యగా మారే ప్రమాదం వుంది. ఇటువంటి మరికొన్ని సమస్యలను ప్రభుత్వం తగిన చతురతతో, జాగ్రత్తతో మొగ్గలోనే తుంచివేసి, ఇప్పుడు ఏ విధమైన వేగంతో ముఖ్యమంత్రి చంద్రబాబు ఈ ప్రాజెక్టు విషయంలో ముందుకు వెడుతున్నారో ఇదే తరహాలో మున్ముందు కూడా వెడితే 2019 ఎన్నికల నాటికి 50 శాతం పనులు పూర్తయి తరువాత 2025 నాటికి ప్రాజెక్టు నిర్మాణ పనులు వంద శాతం పూర్తయ్యే అవకాశం ఉంది. కాటన్ మహాశయుడు గోదావరినది పై ధవిళేశ్వరం ఆనకట్ట, కృష్ణా నది పై ప్రకాశం ఆనకట్ట నిర్మించాక అనూహ్యంగా సర్కారు జిల్లాల అర్ధిక వికాసం సంభవించిన విధంగానే పోలవరం ప్రాజెక్టు పూర్తయిన తరువాత ప్రస్తుత విభజిత ఆంధ్రప్రదేశ్ ‘అన్నపూర్ణప్రదేశ్’గా మారుతుంది.

 

వోద్దనుకున్న దారిలోనే రాహుల్ ప్రయాణం! అంతటా, అన్నిటా వారసత్వమే!! (శనివారం నవీనమ్)

వోద్దనుకున్న దారిలోనే రాహుల్ ప్రయాణం!
అంతటా, అన్నిటా వారసత్వమే!!
(శనివారం నవీనమ్)

కాంగ్రెస్ పార్టీ ఉపాధ్యక్షుడు రాహుల్ గాంధీ ఇటీవల తన అమెరికా పర్యటన సందర్భంగా బర్కెలేలోని కాలిఫోర్నియా విశ్వవిద్యాలయంలో విద్యార్థులను ఉద్దేశించి ప్రసంగిస్తూ భారత దేశంలో వారసత్వ రాజకీయాలు కొనసాగుతున్నాయన్నారు. దీనికి ఉదాహరణగా అఖిలేష్ యాదవ్, స్టాలిన్, అనురాగ్ థాకుర్, అభిషేక్ బచ్చన్ తదితరుల పేర్లు ఉదహరిస్తూ వారసత్వం విషయంలో తననొక్కడి వెంటే పడవలసిన అవసరం లేదన్నారు. భారత దేశంలో ప్రతీదీ వారసత్వంతో పని చేస్తోందన్నారు. కేవలం రాజకీయాలే కాదు, వ్యాపారం, సినిమా తదితర అన్ని రంగాల్లో వారసత్వ వ్యవహారం కొనసాగుతోంది, కేవలం తననొక్కడిని విమర్శించకూడదని ఆయన ఒక ప్రశ్నకు బదులిస్తూ చెప్పారు. రాహుల్ గాంధీ చెప్పింది అక్షర సత్యం.

ప్రజాస్వామ్యం ముసుగులో వారసత్వ రాజకీయంప్రజాస్వామ్యానికి సమాంతర వ్యవస్థగా మారి ప్రజాస్వామ్యాన్ని అవహేళన చేస్తోంది. కాంగ్రెస్, తెలంగాణా రాష్ట్ర సమితి, తెలుగుదేశం, సమాజ్‌వాదీ, నేషనల్ కాన్ఫరెన్స్, బి.జె.డి, ఎన్.సి.పి, తృణమూల్ కాంగ్రెస్, డి.ఎం.కె, ఆర్.జె.డి, అకాలీదళ్, పి.డి.పి తదితర పార్టీలు వారసత్వ రాజకీయాలను కొనసాగిస్తున్నాయి.

బి.జె.పి, వామపక్షాల్లో వారసత్వ రాజకీయం లేదు. వామపక్షాలు కాలం చెల్లిన సిద్ధాంతాలను పట్టుకుని వేలాడుతుంటే బి.జె.పిలో వ్యక్తి ఆధారిత రాజకీయం కొనసాగుతోంది. బి.జె.పికి సంబంధించిన కొన్ని రాష్ట్రాల్లో వారసత్వ రాజకీయం ఉన్నది.

రాహుల్ గాంధీ కొత్తగా రాజకీయాలలోకి వచ్చినప్పుడు వారసత్వ రాజకీయాలను బాహాటంగా విమర్శించారు. యువజన కాంగ్రెస్ ఎన్నికలను ప్రజాస్వామ్య పద్ధతిలో నిర్వహించటం ద్వారా వివిధ పోస్టులకు నాయకులను ఎన్నిక చేసేందుకు ప్రయత్నించారు. కాంగ్రెస్ నాయకుల ఆలోచనా విధానంలో మార్పు రాకపోవటంతో సంస్థాగత ఎన్నికలను ప్రజాస్వామ్య పద్ధతిలో నిర్వహించే ప్రయత్నం విఫలమైంది.

వారసత్వ రాజకీయాల మూలంగానే లోకసభలో అడుగు పెట్టటంతోపాటు మొదట ప్రధాన కార్యదర్శి, ఆ తరువాత ఉపాధ్యక్ష పదవి చేపట్టిన రాహుల్ గాంధీ త్వరలోనే కాంగ్రెస్ అధ్యక్ష పదవి చేపట్టనున్నారు. వారసత్వం మూలంగా రాజకీయాలలోకి వచ్చిన రాహుల్ గాంధీ పార్టీ సంస్థాగత ఎన్నికలను ప్రజాస్వామ్య పద్ధతిలో నిర్వహించాలనే ఆలోచనకు కట్టుబడి ఉంటే పరిస్థితి మరోలా ఉండేది. ఆయన తన ప్రారంభ ఆలోచనా విధానం, వారసత్వ వ్యతిరేకతకు కట్టుబడి ఉండలేకపోయారు. కాల క్రమంలో ఆయన కూడా వారసత్వ రాజకీయాన్ని ఆస్వాదించటం ప్రారంభించారు. అందుకే ఆయన ఇప్పుడు వారసత్వ రాజకీయాలను బలపరచటంతోపాటు కాంగ్రెస్ సంస్థాగత ఎన్నికలను నామమాత్రంగా నిర్వహిస్తూ తనకు నచ్చిన వారిని వివిధ పదవుల్లో నియమిస్తున్నారు.

రాహుల్ గాంధీ ప్రకటన మూలంగా భారతదేశం పరువు, ప్రతిష్ట మంట కలిసిందంటూ కేంద్ర జౌళి, సమాచార శాఖ మంత్రి స్మృతి ఇరానీ, ఐ.టి శాఖ మంత్రి రవిశంకర్ ప్రసాద్ తదితరులు రాహుల్ గాంధీపై దుమ్మెత్తిపోశారు. రాష్టప్రతి రామ్‌నాథ్ కోవింద్, ఉపరాష్టప్రతి ఎం.వెంకయ్యనాయుడు, ప్రధాన మంత్రి నరేంద్ర మోదీ వారసత్వ రాజకీయాల మూలంగా ఈ పదవులకు ఎంపిక అయ్యారా అంటూ స్మృతి ఇరానీ దుయ్యబట్టారు.

వారసత్వ, వ్యక్తి ఆధారిత రాజకీయాల మూలంగానే ఎన్నికల ప్రక్రియ పూర్తిగా అవినీతిమయమైంది. వారసత్వ, వ్యక్తి ఆధారిత రాజకీయ పార్టీలు అధికారంలోకి వస్తే ఏమవుతోందనేది మనందరికి తెలిసిందే. అధికారమంతా అధినాయకుడు లేదా అధినాయకుడి కుటుంబ సభ్యుల వద్ద కేంద్రీకృతమవుతోంది. మిగతా మంత్రులు ఉత్సవ విగ్రహాలుగా మారిపోతున్నారు. అధినాయకులు తీసుకునే నిర్ణయమే శాసనంగా మారుతోంది. పేరుకు ప్రజాస్వామ్యమైనా వాస్తవానికి అధినాయకుడి ఆలోచనా విధానమే పార్టీ,ప్రభుత్వ విధానమవుతోంది. ప్రజాస్వామ్యం ప్రకారం అన్ని స్థాయిల్లో చర్చ జరిగిన అనంతరం నిర్ణయం తీసుకునే ప్రక్రియకు ఎప్పుడో చెల్లుచీటీ ఇచ్చేస్తున్నారు.

కాంగ్రెస్, బి.జె.పి, టి.ఆర్.ఎస్, తెలుగుదేశం, తృణమూల్ కాంగ్రెస్, బి.జె.డి పార్టీల అధినాయకులు చెప్పిందే వేదంగా మారింది. వారసత్వ అధికార వ్యవస్థలు ప్రజాస్వామ్య పద్ధతిలో పని చేస్తే ప్రజలకు మేలు జరుగుతుందని కొందరు వాదిస్తున్నారు. వారసత్వ రాజకీయం అంటేనే కేంద్రీకృత అధికారం, దీనికి ప్రజాస్వామ్యం తోడు కావటం ఏమిటి? ఉత్తర, దక్షిణ ధృవాలు కలవనట్లు వారసత్వ రాజకీయం, ప్రజాస్వామ్య రాజకీయం ఎప్పటికీ కలిసి ఉండలేవు. దేశంలో ప్రజాస్వామ్యం ముసుగులో వారసత్వ రాజకీయం రాజ్యమేలటానికి ప్రధాన కారణం ప్రజల ఆలోచనా విధానమే. ప్రజలు తమ ఓటు ద్వారా మద్దతు ఇస్తున్నారు కాబట్టే వారసత్వ, కుటుంబ, వ్యక్తి ఆధారిత రాజకీయం కొనసాగుతోంది.

నరేంద్ర మోదీకి ప్రజలు బ్రహ్మరథం పట్టినందుకే వ్యక్తి ఆధారిత రాజకీయం పని చేస్తోంది. గతంలో ఇందిరా గాంధీకి కూడా ప్రజలు ఇలాగే మద్దతు ఇచ్చారు. తెలంగాణా ప్రజలు చంద్రశేఖరరావుకు ఊహించని మెజారిటీ ఇచ్చారు.

రాష్ట్ర విభజనతో మండిపోయిన ఆంధ్ర ప్రజలు చంద్రబాబునాయుడు నాయకత్వంలోని తెలుగుదేశం పార్టీకి అధికారం అప్పగించారు.

వారసత్వ రాజకీయాలు నాలుగు కాలాల పాటు నిలదొక్కుకునేందుకు నిరక్ష్యరాసత్యతతోపాటు అక్ష్యరాస్యుల అవగాహనా లోపం, కులం, వ్యక్తుల పట్ల ఉన్న దురభిమానం, ఏదో చేస్తారనే ఆశ, తమను తాము గౌరవించుకోకపోవటం, అర్థవంత ప్రత్యామ్నాయ లేమి ప్రధాన కారణాలు.

వారసత్వ, కుటుంబ, వ్యక్తి ప్రధాన ప్రభుత్వాల్లో పని తక్కువ, ప్రచారం ఎక్కువగా జరుగుతుంది. ఈ ప్రభుత్వాలు గోరంతను కొండంతలు చేసి చూపించటం ద్వారా ప్రజలను మభ్యపెడతాయి. తామున్నాము కాబట్టి రాష్ట్రం, దేశం అభివృద్ధి చెందుతోంది లేకపోతే వెనకబడిపోతాయంటూ తమను తాము ఎక్కువ చేసి చూపిస్తూ ప్రజలను తమ ఉక్కు పిడికిలిలో బిగించివేస్తాయి.

వీరు చివరకు పాలితుల ఆలోచనను సైతం అదుపు చేసేందుకు ప్రయత్నించటంతోపాటు ప్రాథమిక హక్కులకు సైతం భంగం కలిగిస్తారు. ఇలాంటి పరిస్థితి వ్యక్తికి, సమాజానికి, రాష్ట్రానికి, దేశానికి ఎంత మాత్రం మంచిది కాదు. దేశానికి స్వాతంత్య్రం వచ్చి డెబ్బై సంవత్సరాలు దాటుతున్నా ఆశించిన స్థాయిలో అభివృద్ధి సాధించకపోవటానికి వారసత్వ, కుటుంబ, వ్యక్తి ప్రాధాన్య రాజకీయ పాలనే ప్రధాన కారణం.

లంఖణాల ఆంధ్రప్రదేశ్ (శనివారం నవీనమ్)

లంఖణాల ఆంధ్రప్రదేశ్
(శనివారం నవీనమ్)

అంతుచిక్కని అతి ప్రాణాంతకమైన విష జ్వరాలు ఆంధ్రప్రదేశ్ లో అన్ని జిల్లాలనూ చుట్టుముట్టాయి. మలేరియా, సెరిబ్రల్‌ మలేరియా, టైఫాయిడ్‌, డెంగ్యూ, చికున్‌గున్యా, వైరల్‌, ఇంకా గుర్తించలేని జ్వరాలెన్నో జనాన్ని పీడిస్తున్నాయి.

ఇప్పటికే ఒక్కో జిల్లాలో వందలు, వేల సంఖ్యలో మలేరియా కేసులను గుర్తించారు. అది తూర్పుగోదావరి ఏజెన్సీ కావొచ్చు. రాజధాని అమరావతి ప్రాంతమూ కావొచ్చు. అనంతపురంలో అయితే డెంగ్యూ కేసులు ఆందోళనకర స్థాయిలో నమోదవుతున్నాయి. కడపలో భయంకరమైన మలేరియా కేసులు ఆరోగ్య శాఖ దృష్టికొచ్చాయి.

ఈ సమాచారమంతా అధికారికంగా ప్రభుత్వ వర్గాలు వెల్లడిస్తున్నవి. వాస్తవ పరిస్థితి చాలా భయంకరంగా తయారైందని స్థానిక మీడియాలో వస్తున్న వార్తలు తెలియజేస్తున్నాయి.

తొలుత ‘సిఎం కోర్‌ డాష్‌ బోర్డు’లో ఎప్పటికప్పుడు సమగ్ర వివరాలు పొందుపర్చేవారు. మీడియా సంస్థలు ‘సిఎం కోర్‌ డాష్‌ బోర్డు’ వెబ్‌సైట్‌ను సోర్స్‌గా చేసుకొని కథనాలు ప్రచురిస్తుండటంతో అప్‌డేట్‌ ఆపేశారు.

అమరావతి ప్రాంతంలో ప్రావాసాంధ్రులు నిర్మించతలపెట్టిన ప్రైవేటు సూపర్‌ స్పెషాల్టీ హాస్పిటల్‌ శంకుస్థానపన సభలో రాష్ట్ర ఆరోగ్య మంత్రివర్యులు మాట్లాడుతూ ఏపీలో యాభైశాతం మంది ప్రజలకు ప్రభుత్వ ఆసుపత్రుల్లో వైద్యం అందించడమే లక్ష్యమని గొప్పగా ప్రకటించుకున్నారు. దానర్థం ప్రస్తుతం రాష్ట్రంలో సగం మందికి కూడా సర్కారీ వైద్యం అందుబాటులో లేదనే. ప్రస్తుతం ఎంత మందికి పూర్తి స్థాయిలో వైద్య సేవలందిస్తోందో ప్రభుత్వమే చెప్పాలి.

ఈ వర్షాకాలం మొదలయ్యాకనే తూర్పుగోదావరి మన్యంలో చాపరాయి అనే గిరిజన గూడెంలో మలేరియా బారినపడి 16 మంది మృత్యువాతపడ్డారు. ఆలస్యంగా స్పందించిన ముఖ్యమంత్రి వైద్య ఆరోగ్యశాఖదే నిర్లక్ష్యం అని మండిపడ్డారు. తక్షణం ఏజెన్సీలో వైద్య సిబ్బంది పోస్టులు భర్తీ చేయాలని హూంకరించారు. దాదాపు రెండు మాసాలవుతున్నా పోస్టుల భర్తీ అతీగతీ లేదు. విలీన ప్రాంతం చింతూరు ఏరియా ఆసుపత్రిలో 31 మంది సిబ్బందికిగాను ఎనిమిది మందే ఉన్నారు. సిఎం దత్తత తీసుకున్న విశాఖ ఏజెన్సీలోని ‘పెదలబుడు’లోనూ ఇదే పరిస్థితి. రాష్ట్రంలోని ఏడు ఐటిడిఎలలోని 90 శాతం ఆసుపత్రుల్లో గైనకాలజిస్టు, అనస్థిషియా, పీడియాట్రిక్‌ డాక్టర్లు లేరు. ఎస్టీ సబ్‌ప్లాన్‌ నిధులు, కేంద్ర, రాష్ట్ర ప్రత్యేక పథకాలు, రాజ్యాంగం రీత్యా గవర్నర్‌ నేరుగా పర్యవేక్షించే ఏజెన్సీలోనే ఇంత ఘోరంగా ఉంటే తక్కిన ప్రాంతాల్లో ఇంకెలా ఉందో అర్థం చేసుకోవచ్చు.

రాష్ట్ర జనాభా, మొత్తం బడ్జెట్‌ ఈ రెండింటితో పోల్చితే వైద్య శాఖకు చేసే కేటాయింపులు నామమాత్రం. ప్రతిపాదనలే తక్కువ కాగా వాటినీ ఖర్చు చేయక పోవడం మరీ దుర్మార్గం. ముందటేడు 3.39 శాతం ఖర్చు చేయగా నిరుడు 4.50 శాతం ప్రతిపాదించి 4.34 శాతానికి సవరించారు. ఈ ఏడాది 4.47 శాతం నిధులం టున్నా చివరికి ఎంత ఖర్చు చేస్తారో తెలీదు. పిహెచ్‌సిలు, వైద్య విధాన పరిషత్‌ పరిధిలోని కమ్యూనిటీ హెల్త్‌ సెంటర్లు, ఏరియా, జిల్లా ఆసుపత్రుల్లో సిబ్బంది మొత్తం సగానికి సగం మంది కాంట్రాక్టు మీదనే. వాటిలోనూ ఖాళీలున్నాయి. రూ.వెయ్యి, రెండు వేలతో పని చేస్తున్న వేలాది మంది ఆశా వర్కర్లే దిక్కు. చంద్రన్న సంచార కేంద్రాలు, 108 అంబులెన్స్‌లకు డీజిల్‌కే దిక్కు లేక చాలా మట్టుకు మూలనపడ్డాయి.

జనం సౌకర్యాలు అడుగుతుంటే, ఆసుపత్రుల్లో మరణించిన వారిని స్మశానానికి తరలించడానికి ‘మహాప్రస్థానం’ వాహనాలిస్తా మంటున్నారు ఆరోగ్యమంత్రి. సిఎం అయితే హెల్త్‌ టూరిస్టు హబ్‌ను ఏర్పాటు చేస్తామంటున్నారు. అర్బన్‌ హెల్త్‌ సెంటర్ల ప్రైవేటీకరణ వంటి ప్రపంచబ్యాంక్‌ ఆదేశిత చర్యలు సరేసరి. ఆరోగ్యశ్రీ ఉన్నా లేనట్టే లెక్క. జ్వరాలు, పలు అంటు వ్యాధులు అపారిశుధ్యం, కలుషిత తాగునీటి వలన వ్యాపిస్తాయి.

పట్టణాలు, గ్రామాలు మురికి కూపాలుగా మారాయి. కనీసం క్లోరినేషన్‌, బ్లీచింగ్‌ పౌడర్‌కు నిధుల్లేవు. ఆరోగ్యం, పంచాయతీ, మున్సిపల్‌, నీటి సరఫరా అన్ని విభాగాలకూ సమృద్ధిగా నిధులు కేటాయించి, సమన్వయపర్చి ప్రభుత్వం చిత్తశుద్ధితో పని చేయిస్తేనే జ్వరాలు, డయేరియా వంటి అంటు వ్యాధులు అదుపులోకొస్తాయి. టెలీకాన్ఫరెన్స్‌లు, దోమలపై దండయాత్రలు, స్వచ్ఛభారత్‌ వంటి శుష్క నినాదాలతో రోగాలు నయం కావు.

 

పెద్దనోట్ల రద్దు మోదీ ఘోరమైన తప్పు ! (శనివారం నవీనమ్)

పెద్దనోట్ల రద్దు మోదీ ఘోరమైన తప్పు !
(శనివారం నవీనమ్)

* 4 లక్షల కోట్ల అంచనా -16 వేల కోట్లే నల్లధనం?
* నగదు చలామణి 20 శాతం తగ్గుదల
* పెద్దల సొమ్ముని తాకలేకపోయిన డీమోనిటైజేషన్
* పేదలు సామాన్యులకే మిగిలిన కష్టం
* చతికిలపడ్డ సర్వీసు రంగాలు
* దేశాభి వృద్ధి పతనం

ప్రధానమంత్రి నరేంద్ర మోదీ స్వాతంత్రదినోత్సవ ఉపన్యాసంలో డీమానిటైజేషన్‌ వలన రూ.3 లక్షల కోట్ల నల్లధనాన్ని వెలికి తీశామన్నారు. అది నిజం కాదని ఆర్ బి ఐ (రిజర్వు బ్యాంక్ ఆఫ్ ఇండియా) నివేదికను బట్టి స్పష్టమౌతున్నది.

15.44 లక్షల కోట్ల రూపాయల నోట్లను రద్దు చేయగా బ్యాంకింగ్‌ వ్యవస్థలోకి రూ.15.28 లక్షల కోట్లు తిరిగొచ్చాయి. వెనక్కి రానివి కేవలం రూ.16 వేల కోట్లు మాత్రమే.

ప్రధాని మోదీ రూ.500, రూ.1,000 నోట్లు ఉన్నపళంగా రద్దు చేస్తున్నట్లు గత నవంబరు 8 రాత్రి చేసిన ప్రకటన ఇంకా చెవుల్లో వినిపిస్తున్నట్టే వుంది. జనం చెవుల్లో గింగురుమంటోంది. ఐదు లక్ష్యాల సాధనకు పెద్ద నోట్ల రద్దు చేస్తున్నామని నమ్మించారు.

నల్లధనాన్ని పారద్రోలడం, నకిలీ కరెన్సీ నోట్లను ఏరిపారేయడం, ఉగ్రవాదులకు నిధులు అందకుండా కట్టడి చేయడం, పన్నుల వసూళ్లు పెంచడం, నగదు రహిత ఆర్థిక వ్యవస్థను ప్రోత్సహించడం ఆ ఐదు లక్ష్యాలుగా చెప్పుకొచ్చారు.పెద్ద నోట్ల రద్దు వలన తక్కువలో తక్కువ రూ.4 లక్షల కోట్ల నల్లధనం వెలికి వస్తుందని, వాటితో ఎన్నో ప్రజోపయోగ కార్యక్రమాలు చేపట్టవచ్చని బిజెపి సర్కారు ఊదరగొట్టింది.

చెలామణిలో ఉన్న 86 శాతం నోట్ల రద్దు తర్వాత తొమ్మిది మాసాలకు ఆర్‌బిఐ వెల్లడించిన నివేదిక ప్రకారం ఆ లక్ష్యాలేమీ చేరలేదు సరికదా దేశ ఆర్థిక వ్యవస్థ కుంటుపడిందని తేటతెల్లమైంది.

ఈ సమయంలో ప్రజలు పడ్డ కష్టాలు అన్నీ ఇన్నీ కావు. బ్యాంకులు, ఎటిఎంల ముందు క్యూలైన్లలోనే వందలాది మంది ప్రాణాలు పొగొట్టుకున్నారు. వేతనాలందక సంఘటిత, అసంఘటిత కార్మికులు, ఉపాధి హామీ కూలీలు పస్తులున్నారు. పంట రుణాలందక రైతులు నానా అవస్థలూ పడ్డారు. పిల్లల పెళ్లిళ్లకు నగదు దొరకక గుండెలు ఆగిపోయిన తల్లితండ్రులు వున్నారు.

వ్యాపార కార్యకలాపాలు స్తంభించి చిన్న చితకా వర్తకులెందరో నష్టపోయారు. సమస్త ప్రజానీకానికీ పూడ్చుకోలని నష్టాలను, కష్టాలను నోట్ల రద్దు మిగిల్చింది.నిర్దేశిత లక్ష్యాలు సాధించలేకపోతే తనను కాల్చేయాలని ఉద్వేగపూరితంగా మోదీ చెప్పడం టివిల్లో మనం చూశాము.

ఒకే ఒక్క శాతం ఫలితం కోసం ఇంతగా ప్రభుత్వం ఆర్థిక అరాచకత్వం సృష్టించాలా? ఆర్‌బిఐ నివేదికలో కళ్లు బైర్లు కమ్మే అంశాలే ఉన్నాయి. ఇప్పటి వరకు వెయ్యి నోట్ల లెక్కలే తేలాయి. ఇంకా ఐదొందల నోట్ల లెక్క తేల్లేదు. వెయ్యి నోట్ల లెక్కల ఆధారంగా ఐదొందల నోట్ల లెక్కలు చెపుతున్నారు. ఆ లెక్కలూ పూర్తయితే అర శాతం నోట్లే తిరిగి రానివుంటాయన్న వాదన బలంగా వినిపిస్తోంది. ఎన్‌ఆర్‌ఐల వద్ద, సహకార బ్యాంకుల వద్ద ఇంకా రద్దయిన పెద్ద నోట్లు ఉన్నాయంటున్నారు. వాటిని కూడా కలిపితే రద్దయిన నోట్ల కంటే ఐదు నుంచి పది శాతం అధికంగా బ్యాంకులకు వచ్చినట్లే. అంటే నల్ల ధనం రాకపోగా దొంగనోట్లు ఎంచక్కా రాచమార్గంలో మంచి నోట్లుగా మారినట్లే భావించాలి.

నకిలీ కరెన్సీని ఏరిపారేసే లక్ష్యాన్ని డీమానిటైజేషన్‌ సాధించలేదని ఆర్‌బిఐ నివేదిక ద్వారా అర్ధమౌతున్నది. నోట్ల రద్దుకు ముందు ఏడాదిలో 6.32 లక్షల నకిలీ నోట్లను గుర్తించగా, డీమానిటైజేషన్‌ అనంతరం 7.62 లక్షల నకిలీ నోట్లను గుర్తించారు. కొత్త నోట్ల ముద్రణ వలన దాదాపు రూ.4,500 కోట్లు ఆర్‌బిఐపై ఆదనపు ఖర్చు అయింది. కేంద్రానికి ఆర్‌బిఐ డివిడెండ్‌ చెల్లించలేకపోయింది. బ్యాంకు ఆదాయం 23.56 శాతం తగ్గగా వ్యయం 107.84 శాతం పెరిగింది. ఆర్‌బిఐ మిగులు రూ.65 వేల కోట్ల నుంచి రూ. 30 వేల కోట్లకు తగ్గింది. చెలామణిలో ఉన్న రూ.15.44 లక్షల కోట్లను రద్దు చేయగా ప్రస్తుతం 13.10 లక్షల కోట్లు చెలామణిలో ఉన్నాయి. నోట్ల లభ్యత 20 శాతం తగ్గింది. డిజిటల్‌ లావాదేవీలేమీ ఆశించన మేరకు వృద్ధి చెందలేదు.

భారత వృద్ధి రేటు పడిపోవడానికి ప్రధాన కారణం పెద్ద నోట్ల రద్దు ప్రక్రియేనని ప్రపంచ బ్యాంకు మాజీ ముఖ్య ఆర్థికవేత్త కౌసిక్‌ బసు విమర్శించారు. వృద్ధి పతనం చాలా ఆందోళన కలిగించే అంశమన్నారు. నోట్ల రద్దు చర్యతో భారీ మూల్యం చెల్లించుకున్నట్లయ్యిందన్నారు. ప్రస్తుత ఆర్థిక సంవత్సరం ఏప్రిల్‌ నుంచి జూన్‌తో ముగిసిన తొలి త్రైమాసికంలో జిడిపి వృద్ధి రేటు 5.7 శాతానికి పతనమై మూడేళ్ల కనిష్ట స్థాయికి దిగజారింది. ఆర్థిక వ్యవస్థకు అత్యంత కీలకమైన తయారీ రంగం నోట్ల రద్దుతో వెలవెలపోయింది.

ఇదే విషయాన్ని గురువారం కేంద్ర గణాంకాల శాఖ స్వయంగా వెల్లడించిన విషయం తెలిసిందే. ఇది వరకు ప్రపంచ బ్యాంకుకు వైస్‌ ప్రెసిడెంట్‌, ముఖ్య ఆర్థికవేత్తగా పని చేసిన బసు ప్రస్తుతం న్యూయార్క్‌లోని కర్నెల్‌ యూనివర్శిటీలో అర్ధశాస్త్రం ప్రొఫెసర్‌గా పని చేస్తున్నారు. వృద్ధి రేటుపై శుక్రవారం ఆయన పిటిఐకి ప్రత్యేక ఇంటర్యూ ఇచ్చారు.

ఆ వివరాలు.. వృద్ధి రేటు ఆరు శాతం కంటే దిగువకు పడిపోవడం ఆర్థిక వ్యవస్థకు పెద్ద షాక్‌ అని బసు అభివర్ణించారు. అంచనాల కంటే మరీ తక్కువగా 5.7 శాతం వృద్ధి రేటు చోటు చేసుకుందన్నారు. 2003 నుంచి 2011 కాలంలో భారత్‌ ఏకంగా 8 శాతం వృద్ధి సాధించిందన్నారు. 2008 అంతర్జాతీయ ఆర్థిక సంక్షోభంలోనూ దేశం 6.8 శాతం వృద్ధిని కనబర్చిందన్నారు. ప్రస్తుత నూతన జిడిపి లెక్కింపు విధానాలతో పోల్చితే ఆ సమయంలోనూ 8 శాతం ప్రగతి చోటు చేసుకుందన్నారు. ప్రస్తుతం ప్రపంచ మార్కెట్లో చమురు ధరలు తక్కువ స్థాయిలోనే ఉన్నాయన్నారు. తిరిగి 8 శాతం వృద్ధి సాధించాల్సిన అవసరం ఉందన్నారు.

నోట్ల రద్దు వల్లే వృద్ధి రేటు 2.3 శాతం పతనమై 5.7 శాతానికి పరిమితం కావడం ఆందోళన కలిగిస్తోందన్నారు. నోట్ల రద్దు వల్ల జరిగిన పొరపాట్లు, ఎగుమతుల రంగం కూడా అంతంత మాత్రంగా ఉండటం వల్ల స్థూల ప్రగతి నిరుత్సాహ పర్చిందన్నారు. ఈ తప్పులను సరిదిద్దుకోవాలని బసు సూచించారు.

నోట్ల రద్దు చర్య వల్ల ప్రధానంగా చిన్న వ్యాపారులు, అసంఘటిత రంగం, పేద ప్రజలు తీవ్ర ఇబ్బందులకు గురైయ్యారని బసు పేర్కొన్నారు. ధనవంతులు తమకున్న మార్గాల్లో పెద్ద నోట్లను సులువుగా మార్చుకున్నారని తెలిపారు. పెద్ద నోట్ల రద్దు తరహాలో మళ్లీ పొరపాటు చేస్తే 2018 నాటికి కూడా ఆర్థిక వ్యవస్థ తిరిగి పుంజుకోలేదన్నారు. వచ్చే రెండు త్రైమాసికాల్లోనూ వృద్ధి రేటు అంతంత మాత్రంగానే ఉంటుందని బసు అంచనా వేశారు. ముఖ్యంగా గతేడాది అక్టోబర్‌ నుంచి డిసెంబర్‌తో ముగిసే త్రైమాసికంలో వృద్ధి రేటు మరీ మందగించిందన్నారు. నోట్ల రద్దు వల్ల ఈ సమయంలో రైతులు అత్యంత ఒత్తిడిని ఎదుర్కొన్నారని విమర్శించారు. సాధారణ ప్రజల వద్ద నగదు లేకపోవడం, కొనుగోలు శక్తి పడిపోవడం వల్ల రైతులు పండించిన ధాన్యాన్ని విక్రయించుకోలేక పోయారన్నారు. నోట్ల రద్దుతో గతేడాది నవంబర్‌ తర్వాత ప్రజల కొనుగోలు శక్తి తగ్గిపోయిందని, దీన్ని పెంచాలని సూచించారు. రెండోది ఆర్థిక, ద్రవ్య పరపతి విధానాల ద్వారా ఎగుమతులను పెంచుకోవాలన్నారు. సాధారణ ప్రజల కొనుగోలు శక్తి పడిపోయినందున తయారీదార్లు కూడా ఒత్తిడిని ఎదుర్కుంటున్నారు. ఈ క్రమంలో సులభ వ్యాపార పద్ధతిని ప్రోత్సహించడం ద్వారా ఎగుమతులకు మద్దతునివ్వాల్సిన అవసరం ఉందన్నారు.

డిజిటల్‌కు వెళ్లే ప్రయత్నంలో రిస్క్‌ ఉంటే నగదు రూపంలో వెళ్లడమే మంచిదని బసు తెలిపారు. అనేక ధనిక దేశాలు డిజిటల్‌ రూపంలోకి మారడానికి దీర్ఘకాలం సమయం తీసుకున్నాయన్నారు. కాగా భారత్‌ లాంటి దేశంలో ఇప్పటికీ సగం మందికి బ్యాంకు ఖాతాలు లేవన్నారు. అనూహ్యంగా తక్షణమే డిజిటల్‌ నగదులోకి మారాలనుకోవడంలో అర్ధం లేదన్నారు. దీని వల్ల పేదలు చాలా నష్టపోతారన్నారు. ఒక విధంగా చెప్పాలంటే ఇది పేదల వ్యతిరేక విధానమన్నారు. ఇలాంటి పొరపాట్లు చేయకపోతే తిరిగి 2018లో మంచి వృద్ధిని సాధించవచ్చని సూచించారు. ఇందుకోసం వ్యవస్థలో నగదు ప్రవాహం పెంచాలన్నారు.

జి ఎస్ టి – నిజాలు అబద్దాలు (శనివారం నవీనమ్)

జి ఎస్ టి – నిజాలు అబద్దాలు
(శనివారం నవీనమ్)

జీఎస్టీ అమలును ప్రకటిస్తూ ఆర్థికమంత్రి అరుణ్‌జైట్లీ ఒక అంశాన్ని ప్రస్తావించారు. పాదరక్షలు కొనుగోలుపైన అనిల్‌ అంబానీ, సామాన్యుడు ఒక విధమైన పన్ను చెల్లించవలసి ఉంటుందని మంత్రిగారు తమ పన్ను విధానాన్ని సమర్ధించు కొనేందుకు చెప్పారు. ఆ మాట నిజమే – అయితే అనిల్‌ అంబానీ రోజుకు ఎంత సంపాదిస్తాడు, వీధి వెంట తిరిగి కూరగాయలు అమ్ముకునే శ్రామికుడు, ఎంత సంపాదిస్తారు అన్న భేదాన్ని చూడవలసిన పనిలేదా? నల్లధనాన్ని తెల్లగా మార్చుకు నేందుకు, బ్యాంకుల నుంచి వందలు వేలకోట్ల రూపాయలు రుణం తీసుకొని ఎగవేసేం దుకు బడాబాబులకు అవకాశం కల్పిస్తున్న మన పాలనా విధానాలు సామాన్యుడు బ్యాంకునుంచి కనీసం పదివేలు సజావుగా అప్పు తీసుకునేందుకు ఎందుకు అనుమ తించవు? అంటే రాజకీయ పార్టీలు చేస్తున్న జిమ్మిక్కు కారణంగా ఆదాయంలో, సంపదలో, అవకాశాలలో వ్యత్యాసాలు కొనసాగుతూనే ఉన్నాయి.

జీఎస్టీతో దేశమంతటా ఒకే విధమైన పన్నుల విధానం అమలులోకి వచ్చింది కానీ ఒకేపన్ను అని పాలకులు చేస్తున్న ప్రచారం వాస్తవం కాదు. రెండు, మూడు విధాలుగా పన్నుల భారం ప్రజలపైన పడుతుంది. పన్ను రెండు విధాలుగా ఉంటుంది. ప్రత్యక్షపన్ను, పరోక్షపన్ను. వివిధ పరిశ్రమలు, భారీ వాణిజ్య సంస్థలు, కంపెనీలు తమకు వచ్చే ఆదాయంపైన చెల్లించే పన్నును ప్రత్యక్ష పన్ను అంటాము. దేశంలో దాదాపు పదివేల కంపెనీలు ఉన్నప్పటికీ 250-300 బడా కంపెనీలే ఎక్కువ ఉత్పత్తి, వాణిజ్య లావాదేవీలను నిర్వహిస్తున్నాయి. దేశ సంపదలో వీటి వాటా దాదాపు 54శాతం ఉంటుందని గణాంక నిపుణులు అంచనా వేశారు. వాస్తవ గణాంకాలను ప్రభుత్వం ప్రకటిస్తేనే మనకు తెలుస్తుంది. మనదేశంలో స్వాతంత్య్రం వచ్చిన తర్వాత పాలించిన ప్రభుత్వాలన్నీ ప్రత్యక్ష పన్నులకు తక్కువ ప్రాధాన్యతనిచ్చి పరోక్ష పన్నులకు ఎక్కువ ప్రాధాన్యత నిచ్చి ఆదాయం పెంచుకుంటున్నాయి.

ప్రతి కొనుగోలు దారుడూ పరోక్షంగా పన్ను చెల్లించ వలసిందే. అంటే పరోక్ష పన్నులు పెంచిన ప్రతిసారీ వినిమయ దారులపై భారం పెరుగుతుంది. ప్రభుత్వ ఆదాయం పెరుగు తుంది. ప్రభుత్వాలు ఏం చేస్తున్నాయి? ప్రత్యక్ష పన్నులు చెల్లించే బడా కంపెనీలకు ప్రతి బడ్జెట్‌లో 5-6 లక్షల కోట్ల రూపాయల మేర రాయితీ లిస్తున్నాయి. అంటే వీరు చెల్లించే పన్నులు గణనీయంగా తగ్గుతాయి. పెద్ద పెద్ద కంపెనీలు ఎక్కువ పన్నులు చెల్లిస్తాయి, ప్రభుత్వ ఆదాయం వారినుంచే వస్తుందని సామాన్య జనం భావిస్తారు. ఇది వాస్తవం కాదు. ప్రపంచదేశాలలో ప్రత్యక్ష పన్నులు మూడింట రెండువంతులుండగా పరోక్ష పన్నులు ఒకవంతు మాత్రమే ఉంటాయని ఇటీవల విజయవాడలో ప్రజలపై జీఎస్టీ ప్రభావం అన్న అంశంపై ప్రసంగించిన ఢిల్లీ జేఎన్‌యూ ప్రొఫెసర్‌, ఆర్థిక నిపుణులు విశ్వజిత్‌ మజుందార్‌ తన అధ్యయనాన్ని వివరించడం ద్వారా ప్రభుత్వాల బండారాన్ని బయటపెట్టారు. మన పాలకులు ఆరాధ్యదైవంగా భావించే అమెరికాలో అసలు జీఎస్టీనే లేదు. కొన్ని దేశాలలో జీఎస్టీ ఉన్నప్పటికీ గరిష్టంగా 20 శాతానికి మించిలేదు.

 

జీఎస్టీ వల్ల ఉద్యోగులు, వ్యాపారులు, ఎగువ మధ్యతరగతి జనం, ఇంకా ఆదాయం అధికంగా ఉన్న వారు రెండు రకాల పన్నులు చెల్లించాలి. వీటికి తోడుగా వివిధ రకాల సెస్సులు, ఎవరికీ తెలియకుండా, బ్యాంకులు, ఇతర సంస్థలు పెంచివేసిన సేవల’ ఛార్జీలనూ చెల్లించవలసి ఉంటుం ది. ప్రభుత్వం వెంటపడే ప్రజలు బ్యాంకు ఖాతాల ఏర్పా టుకు ఒత్తిడి చేసి లావాదేవీలను అధికం చేయడం వల్ల సామాన్యు లతో సహా దాదాపు అందరూ సెస్సులు చెల్లించాల్సిందే. విద్యుత్‌ బిల్లులు, సెల్‌ఫోన్‌ బిల్లులు లేదా మరో విధమైన బిల్లులున్నా వాటిపై సెస్సులు లేదా ఇతర ఛార్జీలు తప్పవు.
‘పెద్ద మనుషుల’పై భారం లేకుండా వినియోగదారులపైనే భారం మోపిన మరో అంశాన్ని చూద్దాం.

అంతర్జాతీయ మార్కెట్‌లో ముడి చమురు ధర బ్యారెల్‌ 30-40 డాలర్ల దాకా తగ్గి ఇటీవల మళ్ళీ 50 డాలర్లకు అటూ ఇటుగా ఉంది. ధర తగ్గడం వల్ల వచ్చే ఆదాయాన్ని వినియోగదారులకు అందిస్తున్నారా? లేదు. ఆయా కంపెనీలు దిగుమతి చేసుకొని వినియోగదారులకు అందించే ప్రక్రియలో పన్నులు పెంచుతున్నారు. దీనివల్ల మనం కొనుగోలు చేసే పెట్రోలు, డీజిలు, గ్యాస్‌ ధరలు తగ్గడం లేదు. ఇక గ్యాస్‌పైన సబ్సిడీని పూర్తిగా ఎత్తివేసేందుకు గాను నెలకు రూ.4చొప్పున సబ్సిడీ సిలిండరుపై ధర పెంచుతున్నారు. తాము అధికారంలోకి వస్తే ధరలు తగ్గిస్తామని, వ్యవసాయరంగ ఆదాయాన్ని రెట్టింపు చేస్తాంలాంటి ఎన్నో వాగ్దానాలు చేసిన నరేంద్రమోడీ ప్రభుత్వం పూర్తి భిన్నంగా వ్యవహరిస్తోంది.

పన్నులు, సెస్సులు కలిపితే మూడు రకాలుగా ప్రభుత్వా నికి చెల్లించవలసి రావడం వల్ల ప్రజలపైన ప్రత్యేకించి సామాన్యులపై భారం పెరిగి తీరుతుంది. పన్నుల వ్యవస్థ పూర్తిగా అమలులోకి వస్తే ప్రజలకు అంతా మేలే జరుగు తుందని పాలకులు అవకాశం దొరికిన ప్రతివేదికమీద మాట్లాడుతూ ప్రచారం చేయడంలో నిజం ఉందా? పెద్దనోట్ల రద్దునాడు కూడా ఇదే విధమైన ప్రచారం చేశారు. దీర్ఘకాలంలో ప్రజలకు ఎంతో మేలు జరుగుతుందని ఊదరగొట్టారు. జీడీపీ వృద్ధిరేటు తగ్గిందన్న అంశాన్ని కప్పి పుచ్చుకునేందుకు గణాంక పద్ధతిని మార్చివేసి వృద్ధిరేటు 7శాతంగా ప్రకటించుకున్నారని, అసలు వృద్ధిరేటు 5 శాతమేనని మాజీ ఆర్థికమంత్రి, బీజేపీనేత యశ్వంత్‌సిన్హా ప్రకటించారు. మీడియా సంస్థలు కనీసం ఈ సమాచారాన్ని ప్రజలకు అందించలేదు.

అన్నంపెట్టే రైతును కూడా జీఎస్టీలో ప్రభుత్వం వదిలిపెట్టలేదు. ఇంతవరకు పన్నులేని వ్యవసాయ ఉపకరణాల పైన కూడా పన్నువేశారు. నీతి అయోగ్‌ సిఫారసు చేసినట్టు వ్యవసాయ ఉత్పత్తులపైన పన్ను విధించకుండా కనికరించారు. అయితే ఉత్పత్తులను మార్కెట్‌కు తీసుకువెళ్ళి అమ్మితే పన్ను ఉంటుంది. కొనుగోలు చేసినా, విక్రయించినా పన్ను చెల్లించ వలసిందే. పోనీ ప్రజలనుంచి వసూలు చేసిన పన్ను ఆదాయాన్ని తిరిగి వాళ్లకోసం ఖర్చు చేస్తారా? అదీలేదు. నాలుగు, ఆరులైన్ల రహదారులు, విమానాశ్రయాలు, ఇతర ప్రభుత్వ అవసరాల కోసం పలు అంతస్తుల భవనాలు నిర్మిస్తున్నారు. ప్రధానమంత్రి నుంచి రాష్ట్రాల, కేంద్రమంత్రుల విదేశీ ప్రయాణాలకు వందలు, వేలకోట్ల ఖర్చు చేస్తున్నారు. ఏసీ రైళ్లు తిప్పుతున్నారు. వాటిలో సామాన్యుల కోసం ఒకటి, రెండు బోగీలు వేస్తారు. వాటిలో ఎక్కడానికి, దిగడానికి కూడా చోటులేక కిటకిటలాడుతుంటాయి. ఆధునిక రహదారులన్నీ ఎక్కువగా ఎగువ మధ్యతరగతి, సంపన్న వర్గాల వాహనాల కోసమేనని పలు సర్వేలు స్పష్టం చేశాయి. ‘పారదర్శక పాలనలో’ ప్రధానమంత్రి విదేశీ పర్యటనల కోసం ఎన్ని వేలకోట్లు ఖర్చు చేశారో తెలియదు. ఆర్‌.టి.ఐ. చట్టం కింద సమాచారం సైతం ఇవ్వలేదు.

జీఎస్టీ వల్ల బ్యాంకుల ద్వారా లావాదేవీలు పెరుగుతాయి. ఆన్‌లైను ద్వారా జరిగే లావాదేవీలన్నింటిపైన ఛార్జీలు వసూలు చేస్తారు. నోట్ల తర్వాత పాలకులు ఆన్‌లైన్‌ లావాదేవీల కోసం చేసిన ఒత్తిళ్ల కారణంగా వసూలు చేసే వేలకోట్ల విదేశీ విసా, మాస్టర్‌కార్డు సంస్థలు ప్రయోజనం పొందాయి. సాంకేతిక పరిజ్ఞానం 70-80 శాతానికి పైగా ప్రజలకు లేదన్న అంశాన్ని సైతం పాలకులు విస్మరించడం ఆశ్చర్యం. పెద్దమొత్తాల్లో జరిగే లావాదేవీలకు ఆన్‌లైన్‌ను వినియోగించుకోవచ్చు. స్వల్ప మొత్తాల కొనుగోళ్లు, అమ్మకాలకు నగదు లావాదేవీలే మెరుగైన వని ప్రజల అనుభవం చెపుతుంది. ప్రజలకు ఉపయోగపడని పథకాలు ఫలితాలనివ్వవు.సీనియర్‌ పౌరులకు కొత్తగా ప్రకటించిన ప్రధానమంత్రి వయో వందన యోజన (పిఎంవివివై) పథకం గతంలో ఉన్న వరిష్ట బీమా యోజనలాంటిదే. వరిష్ట బీమా యోజన 2014 ఆగస్టు నుంచి 2015 ఆగస్టు వరకు అమలులో ఉంది. ఆ పథకానికి వడ్డీరేటు 9శాతం ఉండగా దాన్ని తాజా పథకంలో 8 శాతంగా నిర్ణయించారు. పిఎంవివివైలో చేరేందుకు 2018 మే 3వ తేదీ వరకు అనుమతిస్తారు. పదేళ్లు ఈ పథకం గడువు. లక్షన్నర కనీసం ఈ పథకంలో వేస్తే నెలకు వేయి రూపాయలు, గరిష్టంగా ఏడున్నర లక్షలు మదుపు చేస్తే నెలకు రు.5వేలు ఆదాయం వస్తుంది. దీంతో వృద్ధులైన భార్యాభర్తలు బతుకుతారా? చిన్న, చిన్న కుటుంబాలైపోయిన వ్యవస్థలో వృద్ధుల అవస్థలు వర్ణనాతీతంగా ఉన్నాయి. ఇప్పటికీ దారిద్య్ర రేఖకు దిగువన ఉన్న వారి సంఖ్య 30-40శాతం ఉందని అంచనా. ఆస్తుల కోసం పిల్లలు తల్లిదండ్రులను హింసిస్తూ, అవసరమైతే హతమారుస్తున్న పరిస్థితులు నెలకొన్నాయి. వృద్ధుల సంఖ్య పెరుగుతోంది. రోజురోజుకీ బ్యాంకులలో పోస్టల్‌ ఫిక్స్‌డ్‌ డిపాజిట్ల వడ్డీరేట్లు తగ్గిస్తున్నారు. పదిలక్షలు బ్యాంకుల్లో వేసినా వచ్చే ఆదాయం 6,7 వేలు మించదు. 1960-70 మధ్యకాలంలో వడ్డీరేటు దాదాపు అర్ధ రూపాయి ఉండేది. మళ్ళీ ఇప్పుడు అదే వడ్డీరేటు ఉంది. నిరాదరణకు గురవుతున్న వృద్ధులను పరిహాసం చేసేదిలాగా ఉంది కొత్త పథకం. రకరకాల వ్యాధులతో తల్లడిల్లే వయసులో ఒకేసారి 3,4 లక్షలు అవసరమైతే ఎవరు ఆదుకుంటారు? ఈ పథకం కొంతమొత్తం వెనక్కి తీసుకుంటే వచ్చే ఆదాయం తగ్గిపోతుంది. అప్పుడు జీవనం కష్టమవుతుంది.

వయోవృద్ధులు కనీసం పదిలక్షలు జీఎస్టీ లేకుండా బ్యాంకులలో వేసుకోవచ్చునని ప్రభుత్వం ప్రకటిస్తే వందలు, వేలకోట్లు బ్యాంకులకు చేరుతుంది. ఆ మొత్తాన్ని పరిశ్రమల స్థాపనకు వినియోగించు కోవచ్చు. కొత్తకొత్త పథకాల వల్ల ప్రయోజనం తక్కువ. వాస్తవ పరిస్థితులను లోతుగా అధ్యయనం చేయకుండా జీఎస్టీని, కొత్త పథకాలను ప్రకటించి వాటి ప్రచారానికి వందల కోట్లు ఖర్చు చేస్తే పాలకులకు పదవులు పదిలంగా ఉంటాయోమోగానీ ప్రజలకు ప్రయోజనం ఉండదు. గ్రామాల్లో రోజుకు 22 రూపాయలు, పట్టణాల్లో రోజుకు 32 రూపాయల ఖర్చుతో ఒక వ్యక్తి జీవించవచ్చునని గతంలో మాంటెక్‌సింగ్‌ అహ్లువాలియా అంచనా వేసిన దానికంటే మరింత దిగజారుడు పథకాలు ఇప్పుడు ప్రకటిస్తున్నారు. అందమైన రహ దారులు, ఆకాశ హర్మ్యాల నిర్మాణం, లగ్జరీకార్లు, భారీ విమానా శ్రయాలు, ఏసీ రైళ్లు, ఐటి రంగం విస్తరణ, స్మార్ట్‌ఫోన్లు మాత్రమే అభివృద్ధి అనుకుంటే అంతకంటే అవివేకం మరొకటి ఉండదు. పాలకులు తమ చిత్తం వచ్చినట్టు తమ ఆశ్రితులకు, సంపన్ను లకు మాత్రమే ప్రయోజనం కలిగించే విధానాలు రూపొం దిస్తున్నారు. వీటిని సామాన్యజనం అర్థం చేసుకోకపోయినా, మధ్యతరగతి చదువరులు అర్ధం చేసుకోగలరు. ఇప్పటికైనా వీరు స్పందించక పోతే మరిన్ని కష్టాలపాలు కావల్సి వస్తుంది.
వివిధ దేశాల్లో జీఎస్టీ
కెనడా – 13-15%
ఫ్రాన్సు – 20%
బ్రిటన్‌ – 20%
న్యూజిలాండ్‌ – 15%
మలేషియా – 6%
సింగపూర్‌ – 7%

ఇండియా – 5 నుంచి 28 %

వీర్రాజే…ఇంకెవరు? (శనివారం నవీనమ్)

వీర్రాజే…ఇంకెవరు?
(శనివారం నవీనమ్)

వచ్చే ఎన్నికల నాటికి ఆంధ్రప్రదేశ్ లో సొంత బలంతో ప్రభుత్వాన్ని ఏర్పాటు చేయగల శక్తి సామర్ధ్యాలు బిజెపికి లేవు. అయితే ఆ పార్టీ కేడర్ లో, మద్దతుదారుల్లో, సానుభూతి పరుల్లో ఉత్సాహం నింపి ఓటింగ్ బలం పెంచుకోవడం మీదే బిజెపి హైకమాండ్ దృష్టివుంది. ఈ సందర్భంగా పార్టీ రాష్ట్ర సారధ్యాన్ని ఎమ్మెల్సీ సోము వీర్రాజుకి అప్పగించగల అవకాశాలు బాగా కనిపిస్తున్నాయి.

ప్రత్యేక హోదా విషయంలో బిజెపి మాటతప్పిందన్న ఆగ్రహం ప్రజల్లో వుంది. పెద్ద నోట్ల రద్దు విషయంగా ఎగువ మధ్యతరగతి, మధ్యతరగతి ఆదాయ వర్గాల్లో బిజిపి పై కోపం వుంది…పెద్దగా పట్టూ, బలమూ లేని బిజెపికి ఆంధ్రప్రదేశ్ లో ఈ రెండూ కొత్తగా ఎదురౌతున్న వ్యతిరేకతలు.

ఎపిలో తెలుగుదేశం, బిజెపిల సంబంధాలు అంతంత మాత్రంగా వున్నాయి. ఇవి తెగిపోకుండా బిజెపిలో చక్రం తిప్పిన వెంకయ్యనాయుడు క్రియాశీలక రాజకీయాలను (ఉపరాష్ట్రపతి అవుతున్న కారణంగా) విరమించారు. ఇపుడు ఆయన పాత్ర నిర్వహించేవారు బిజెపిలో ఎవరూలేరు.

ఈ నేపధ్యంలో ఆంధ్రప్రదేశ్ బీజేపీ రాష్ట్ర అధ్యక్షుడుగా దాదాపు సోము వీర్రాజు పేరు ఖరారయినట్లు భావిస్తున్నారు.గత సంవత్సరం క్రితమే వీర్రాజు అభ్యర్థిత్వం ఖరారు కావాల్సి ఉండగా అప్పటి పరిస్థితుల్లో ఏర్పడిన అడ్డంకులు వలన మరికొంత కాలం కొనసాగాలని ప్రస్తుత అధ్యక్షుడు డా.హరిబాబును కొనసాగించటం జరిగింది.

అయితే ఒక్క అడుగు కూడా ముందుకు ఆ పార్టీ పెరిగే దిశగా సాగలేదని,అందుకు అనేక కారణాలున్నాయని ఆపార్టీ వర్గాలు సమాచారం సేకరించింది. వీర్రాజు  అధ్యక్షుడు కాకుండా నిలవరించటంలో వెంకయ్య నాయుడు అడ్డుపదినందుకే ఆగిందని ఫలితంగా బీజేపీ బలపడకుండా  చెయ్యటం లో కూడా విజవంతమయి బీజేపీ ని మాత్రం బలహీనపడిందని అధిష్టానం గ్రహించిందనే విషయం కూడా పలు పత్రికల్లో వార్తలు వచ్చాయి కూడా.

2019 ఎన్నికల నాటికి రాష్ట్రంలో  బలపడే దిశలో బిజెపి ని నడిపించడానికి పూర్తీ స్థాయి అధ్యక్షుడి నియామకం అనివార్యమౌతోంది. మాజీ మంత్రి పురందేరేశ్వరి,  నర్సాపురం ఎంపీ గోకరాజు గంగరాజు ల పేర్లు కూడా వినిపించినా పురందేశ్వరి కి అధ్యక్ష పదవి కట్టబెడితే కొత్తగా వచ్చి చేరేవారు లేరని,అలాగే గంగరాజు కి సారధ్యం ఇచ్చినా  పెద్దగా కులబలం లేనందున పార్టీ కి కలిగే లాభం అంతంత మాత్రమేనని అధిష్టానం గ్రహించినట్లు భోగట్టా.

అంకిత భావంతో పనిచేస్తున్న వీర్రాజు గతంలోనే రాజమండ్రి లో బీజేపీ బహిరంగ సభ ఏర్పాటు చేసి, అసభకు హాజరైన జాతీయ పార్టీ అధ్యక్షుడు  అమిత్ షా ముందు తన సత్తా చాటారని,అయితే కొన్ని లాబీలు అడ్డుపడి, అయన గూర్చి అధిష్టానానికి అడ్డమైన మాటలు చెప్పి అడ్డుపడ్డారనే విషయం ఆలస్యంగా గ్రహించిందని లేదంటే ఇప్పటికే బీజేపీ రాష్ట్రంలో బలపడి ఉండేదని గుర్తించినట్లు ఆ వర్గాలు పేర్కొంటున్నాయి.

కాపు వర్గానికి చెందిన వీర్రాజు అధ్యక్షుడయితే అటు కాంగ్రెస్ ఇటు టీడీపీ తో విసిగి వేసారిన వర్గం బీజేపీ వైపు వచ్చే అవకాశాలను అధిష్టానం పరిశీలించిందని ఆ మార్గంలో వీర్రాజుకే అధ్యక్ష పట్టం కట్టేందుకు ఇప్పటివరకు వున్న అవరోధాలను తొలగించిందని ఆ పార్టీ వర్గాలు పేర్కొంటున్నాయి.

 

 

 

అపురూపం, అద్భుతం – యోగ జీవనం (శనివారం నవీనమ్)

అపురూపం, అద్భుతం – యోగ జీవనం
(శనివారం నవీనమ్)

రకరకాల ఆసనాలు వేయడం, ప్రాణాయామం వంటిప్రక్రియలుసాధన చేయడమే యోగ జీవనంఅనుకుంటారు చాలామంది.నిజానికి అవి సోపానాలుమాత్రమే!

యోగ జీవనం సిద్ధించడానికిఅవన్నీసాధనాలు, పరికరాలు. యోగమనేది ఒకానొకపరిపూర్ణ జీవనవిధానం. వట్టి ఆరోగ్యం కోసమే కాదు- శారీరక, మానసిక, ఆధ్యాత్మిక కక్ష్యలు మూడింటా అదుపు సాధించి, మనిషి స్థితప్రజ్ఞతతో ఆనందంగా, ఆరోగ్యంగా సంపూర్ణ ఆయుర్దాయాన్ని అనుభవించడమే యోగజీవనం. అది జీవకళతొణికిసలాడే జీవన కళ. దానికోసం మనిషికి యోగ సాధనతప్పనిసరి. సాధనలేకపోతే మనసుకు ఒక ప్రత్యేకఅస్తిత్వంఏర్పడుతుంది. ఇంద్రియాలకు నాయకత్వంవహించిమనిషిపై పెత్తనం చలాయిస్తుంది. మనసు ఆజ్ఞకులోబడిన ఇంద్రియాలు అది చెప్పినట్లు నడుస్తాయి. చిత్తవృత్తులుఏదారిలో పోతే మనిషి సైతం ఆ దారిలోనే పరుగులెడతాడు.

ఉదాహరణకు భోజనం చేసేటప్పుడు మనసు గత రాత్రిచూసినసినిమా మీద లగ్నమైందనుకోండి- మనిషి భౌతికంగాకంచం దగ్గరున్నా, మానసికంగా సినిమాహాల్లో ఉంటాడు. కళ్లుఆహారపదార్థాల్ని చూస్తూనే ఉంటాయి, దృష్టి మాత్రం ఇక్కడ ఉండదు.ఆ స్థితిలో ఐ బ్యాంకులో దాచి ఉంచిన కళ్లకీ వీటికీపెద్ద తేడా ఏమీఉండదు. మనిషి ఆఫీసులో ఉంటే మనసు ఇంటిలో ఉండటం,వాహనాన్ని నడుపుతూ అప్పుల గురించో, షేర్‌ మార్కెట్‌ పతనంగురించో ఆలోచించడం అలవాటైనవారందరికీ యోగ సాధన చాలాఅవసరం.

పూజ్యభావంతోతినకపోతే అన్నం ఒంటపట్టదన్నాడుమనువు. ఏకాగ్రత లోపిస్తే పనులూ చెడతాయి. చిత్తవృత్తుల నిరోధమే యోగం అంటారు. అంటే ఏ పని చేస్తుంటే ఆ పనిమీదే మనసు లగ్నంకావడం! అదే యోగ జీవనమంటే. అది జీవితాన్ని జీవనయోగ్యం చేస్తుంది.

మనసుతో స్నేహం కుదుర్చుకోవడమంటే- మనిషి తనతో తాను యోగ స్థితిని అనుభవించడమని లెక్క! తనతో తాను ఉండటం, తనలో తాను ఉండటం నిజానికి కష్టసాధ్యమైన విషయాలు. వ్యక్తిగతంగా మనసుతో చక్కని సమన్వయం సాధించుకున్న మనిషికి సామాజికంగా తన చుట్టూ ఉన్న ప్రపంచంతో శ్రుతి కలపడం తేలికవుతుంది. పదిమందిలో ఇమడలేక చాలామంది తమను ప్రత్యేకంగా వూహించుకుంటారు. రాగద్వేషాలకదే పునాది. దాంతో అశాంతి మొదలవుతుంది.

మనిషికి ‘ఇక్కడ సుఖంగా ఉన్నాను’ అనిపించే ఆవరణను మనస్తత్వవేత్తలు ‘కంఫర్ట్‌జోన్‌’ అంటారు. యోగం సిద్ధించిన వారికి ఈ లోకమంతా కంఫర్ట్‌జోన్‌ అవుతుంది. ఆ స్థితిలో మనిషికి తనతోనేకాదు, ప్రపంచంతోనూ ఘర్షణ ఉండదు. అలాంటివారిని ‘వీతరాగులు’ అని వర్ణించారు పతంజలి మహర్షి.

యోగజీవనం గడిపేవారికీ కష్టాలొస్తాయి, కుంగిపోవడం ఉండదు. భోగాలొస్తాయి, మునిగిపోవడం ఉండదు.రైలుప్రయాణంలో గాంధీజీ కాలిచెప్పు ఒకటి జారిపడిపోయింది. వెంటనే రెండో చెప్పును ఆ దిశగా విసిరేశారాయన. ఆయన ఆంతర్యమేమిటో తెలిస్తే- మనిషి యోగ జీవనం ద్వారా స్వీయ ప్రయోజనాల పరిధిలోంచి లోక ప్రయోజనాల పరిధిలోకి విస్తరించడమంటే ఏమిటో బోధపడుతుంది. యోగమంటే వ్యాపించడమని తెలుస్తుంది

యోగ సాధన వల్ల సుఖంగా బతకనివ్వడం సాధ్యమవుతుంది. ‘నేను, నాది’ అనే పరిధిలోంచి ‘మనము, మనది’ అనే పరిధిలోకి వ్యాపించడం కుదురుతుంది. కనుక ఇంటాబయటా బతుకులో ప్రశాంతత లభించడానికి అవకాశాలు పెరుగుతాయి.

దానికితోడు యోగప్రక్రియల ద్వారా మరో గొప్ప ప్రయోజనం సిద్ధిస్తుందని తాజా పరిశోధనలు వెల్లడిస్తున్నాయి. యోగసాధన శృంగార జీవితాన్ని బాగా ప్రభావితం చేస్తుందన్నది వాటి సారాంశం. ఆరోగ్యానికి మాత్రమే కాక శృంగారానికి ఉత్ప్రేరకంగానూ యోగసాధన పనికొస్తుందని బ్రిటిష్‌ కొలంబియా విశ్వవిద్యాలయ పరిశోధకులు ఇటీవల ప్రకటించారు. శృంగారంలో అసంతృప్తికి లోనయ్యే మహిళలు భారతీయ యోగసాధనల ద్వారా పరిస్థితిని చక్కదిద్దుకోవచ్చునంటున్నారు. వారిలో లైంగిక ఆసక్తిని ప్రేరేపించడం మొదలు భావప్రాప్తిని కలిగించడం వరకు యోగా తోడ్పాటు అందిస్తుందని తేలింది.

అలాగే పురుషుల్లో శీఘ్రస్ఖలనంతో పాటు ఎన్నో సమస్యలను నివారించడమూ సాధ్యమని చెబుతున్నారు. ‘మైండ్‌ఫుల్‌నెస్‌’ అనేది దీని అంతటికీ కారణంగా వారు విశ్లేషిస్తున్నారు. మనిషి తాను ప్రస్తుతం ఏ స్థితిలో ఉన్నాడో దానిపట్ల సంపూర్ణ అవగాహన కలిగి ఉండటాన్నే వారు మైండ్‌ఫుల్‌నెస్‌గా చెప్పారు. దాన్నే మనం ‘వర్తమానంలో ఉండటం’ అంటాం. నిన్నటి దిగులులోనో, రేపటి బెంగలోనో కాకుండా ఈ క్షణంలో మనిషి తనతో తాను ఉండటమే ఏకాగ్రత.

యోగప్రక్రియల ద్వారా అలాంటి ఏకాగ్రతను సాధిస్తే శృంగార జీవితం రసమయం అవుతుందన్నది ఆ పరిశోధనల సారాంశం.

 

 

కృష్ణాడెల్టాకు ”పట్టిసీమ” భిక్ష! (శనివారం నవీనమ్)

కృష్ణా నదిలో నీళ్ళు అత్యంత నిరాశను కలిగిస్తున్నాయి. నైరుతి రుతుపవనాల వల్లవచ్చే వాననీరే ఈ నదికి నీటివనరులో 74 శాతం వుంది. జూలై రెండోవారం ముగుస్తున్నా ఈఏడాది 10 శాతం నీరుకూడా నదిలో లేదు. అయితే ప్రకాశం బ్యారేజి నుంచి పదమూడు లక్షల ఎకరాల ఆయకట్టు వున్న కృష్ణా గుంటూరు జిల్లాల్లో కృష్ణా డెల్టాకు  నీరు బాగా అందుతున్నది. బ్యారేజి నుంచి 7 వేల క్యూసెక్కుల వరకూ నీరు సముద్రంలోకి పోతున్నది.

నదిలో నీరు లేకపోయినా డెల్టా పచ్చగా వుందంటే అది పట్టిసీమ ఎత్తిపోతల పధకం ఫలితమే! అయితే ఇది శాశ్వత పరిష్కారం కాదు, కాకూడదు. గోదావరిలో ఇపుడు నీళ్ళ పరిస్ధితి బాగానే వుంది కాబట్టి ఈ నీరు కృష్ణా డెల్టాకు వెళ్ళినా అభ్యంతరం వుండదు… గోదావరిలో నీళ్ళు లేనప్పుడు కూడా ఇప్పటి తరలింపే కొనసాగితే అది ప్రాంతీయ తగాదాలకు దారితీస్తుంది. ఈ విషయమే నేను ఫేస్ బుక్ లో ట్విట్టర్ లో రాసినప్పుడు, నేను లేనిపోని తగాదాలు పెడుతున్నానని బండబూతులు మొదలయ్యాయి. అలా కామెంట్లు రాసిన వారంతా కృష్ణా, గుంటూరు జిల్లాల వారే! నా పోస్టులకి కామెంట్ల ద్వారా మద్దతు ఇచ్చిన గోదావరి జిల్లాల వారు నలుగురే! సోషల్ మీడియాలో కూడా కృష్ణా గుంటూరు జిల్లాల వారే ముందున్నారనడానికి మాత్రమే ఇది ఉదాహరణ! అంతే తప్ప, బండబూతులు మినహా నా ప్రతిపాదనకు ఖండనా లేదు. విమర్శా లేదు.

గత ఏడాది గోదావరిలో వెయ్యి క్యూసెక్కుల కంటే తక్కువ నీరు వున్నప్పుడు కూడా పట్టిసీమనుంచి కృష్ణానదికి నీరు వదిలేశారు. అపుడు గోదావరి డెల్టాల రైతులు తమ కే నీరు చాలడంలేదని గగ్గోలు పెట్టాకే పట్టిసీమ ఎత్తిపోతలను నిలుపుదల చేశారు.

పట్టిసీమ ఎత్తిపోతల అనేది ఒక ఏర్పాటు మాత్రమే…పరిష్కారం కాదు…ఏర్పాటు ఎప్పటికీ వివాదమే! మానీళ్ళు వాళ్ళు ఎత్తుకుపోతున్నారంటే వాళ్ళకు కోపం వస్తుంది…కృష్ణా డెల్టాకు పట్టిసీమ భిక్ష అంటే వారికి నచ్చదు. ఎందుకంటే ఇది అధికారంలో వున్న వాళ్ళ ఇష్టారాజ్యమే అవుతుంది…అంతే కాని అందరికీ ఆమోదయోగ్యమైన నీటి పంపకంకాదు.

గోదావరి నదికి కూడా నైరుతీ రుతుపవనాల ద్వారానే అత్యధిక నీరు లభిస్తుంది. ధవళేశ్వరం ఆనకట్టకు పైభాగంలో తెలంగాణ రాష్ట్రంలో నిర్మించబడి ఉన్న జలాశయాల్లో నీటి నిల్వలు తక్కుగా ఉన్నాయి. అయినా, గోదావరి నది దిగువ ప్రాంతంలో వర్షపు నీరు పుష్కలంగా లభిస్తున్నది. ధవళేశ్వరం ఆనకట్ట గరిష్ట నీటి నిల్వ సామర్థ్యం 2.93 టియంసిలు.ఆ మేరకు నీటిని నిల్వ చేసి, గోదావరి డెల్టాకు సాగు నీరు విడుదల చేస్తున్నారు. ఇంకా 88,265 క్యూసెక్కుల నీటిని ధవళేశ్వరం ఆనకట్ట నుండి క్రిందికి వదిలేస్తున్నారు.

రాష్ట్ర ప్రభుత్వ ఇరిగేషన్ వెబ్ సైట్ లో పొందు పరచిన గణాంకాలను బట్టి ఈ రోజు ప్రకాశం బ్యారేజీలోకి 7,668 క్యూసెక్కుల నీరు చేరుతున్నది. ఇందులో అత్యధిక భాగం పట్టిసీమ ఎత్తి పోతల  ద్వారా తరలిస్తున్న గోదావరి నీరే.

జూలై రెండో వారం పూర్తయినా కృష్ణా నదిలో నీటి లభ్యత ప్రశ్నార్థకంగా ఉంటే, గోదావరి నది నీరు సముద్రం పాలౌతున్నది. పోలవరం బహుళార్థ సాధక ప్రాజెక్టు నిర్మాణం యుద్ధ ప్రాతిపదికపై పూర్తి చేస్తే తప్ప వృధాగా పోతున్న నీటిని సద్వినియోగం చేసుకోలేం.

 

 

ప్రచారం ఘనం – ఫలితం పూజ్యం (శనివారం నవీనమ్)

ప్రచారం ఘనం – ఫలితం పూజ్యం
(శనివారం నవీనమ్)

ప్రధానమంత్రి విదేశీ పర్యటనకు వెళుతున్నారంటే ఆదేశానికి, మన దేశానికీ మధ్య సంబంధాలు, ప్రయోజనాలు, ఒప్పందాలు, యదార్ధ స్ధితులపై విదేశాంగ శాఖ, ప్రధాన మంత్రి కార్యాలయం ఎంత కసరత్తు చేసేదో, జర్నలిస్టుల మధ్య అంతే స్ధాయిలో చర్చలు జరిగేవి. ఈ చర్చలకు హిందూ దినపత్రిక అప్పట్లో జర్నలిస్టులకు పెద్ద రిసోర్సు గా వుండేది.

ఇపుడు సమాచార సాధనాలకు అంతే లేకుండా పోయింది. సోంత అభిప్రాయాలే సమాచారం గా చెలామణి అవుతున్నాయి. అవే వార్తలైపోతున్నాయి.లోతులు చూసి  విశ్లేషణలు చేయగల జర్నలిస్టులు అంతరించిపోతున్నారు.

ప్రధాని నరేంద్రమోదీ అమెరికా పర్యటన పై సాగుతున్న ప్రచారానికి వాస్తవానికీ మధ్య పొంతన లేకపోడానికి మూలం ఈ డొల్లతనమే!

మోడీ అమెరికా పర్యటన వల్ల  ప్రజలకు ఒనగూడింది శూన్యం. ఇద్దరు నాయకులూ ఒకరినొకరు పొగుడుకోవడం, ఉగ్రవాదంపై దండెత్తుతామని పాత ప్రకటనల పునరుద్ఘాటన తప్ప భారతదేశానికి లభించిన ప్రయోజనమేమీ కనిపించడం లేదు.

ట్రంప్‌ అనుసరిస్తున్న భారత వ్యతిరేక వైఖరిని నరేంద్రమోడీ తన పర్యటనలో ఏమైనా మార్చ గలిగారా? హెచ్‌1 బి వీసాల విషయంలో భారతీయ విద్యార్థులకు వ్యతిరేకంగా అనుసరిస్తున్న కఠిన వైఖరిని ఏమైనా సడలింప చేయగలిగారా? వాతావరణ మార్పులకు సంబంధించి ప్రపంచంతో కలిసి నడవాల్సిన ఆవశ్యకతను ట్రంప్‌కు మోడీ వివరించ గలిగారా? భారత్‌లో పెట్టుబడులకు సంబంధించి నిర్దిష్టమైన హామీ ఏమైనా పొందారా? అని ప్రశ్నిస్తే సమాధానాలు లేవు.

ట్రంప్‌, మోడీల భేటీ, చర్చల గురించి మదింపు చేయడానికి వారిద్దరు కలిసి నిర్వహించిన విలేకరుల సమావేశం, జారీ చేసిన ఉమ్మడి ప్రకటనే ఆధారం. పాత్రికేయులకు ప్రశ్నలు వేసే అవకాశాన్ని తీసేశారు.

ఉమ్మడి ప్రకటనలో లక్షలాది మంది ఎదురు చూస్తున్న హెచ్‌1బి వీసాల ప్రస్తావన కూడా లేదు. ఇది నిరాశ కలిగించే అంశం.

ప్రకటనలో పాకిస్తాన్‌, చైనాలపై ప్రత్యక్ష, పరోక్ష దాడి ప్రస్తావనే ప్రముఖంగా వుంది. పాకిస్తాన్‌ భూ భాగం నుండి ఉగ్రవాద కార్యక్రమాలను ప్రోత్సహించడం మానుకోవాలని ఈ ప్రకటన పేర్కొంది. చైనా పేరు ప్రస్తావించకుండా, చైనా తలపెట్టిన ఒన్‌రోడ్‌, ఒన్‌బెల్ట్‌ ప్రాజెక్టు గురించి వ్యాఖ్యలు ఈ ప్రకటనలో వున్నాయి.

ట్రంప్‌తో భేటీకి ముందు హిజ్బుల్‌ ముజాహిద్దున్‌ నేత సయ్యద్‌ సలాముద్దీన్‌ను అంతర్జాతీయ ఉగ్రవాదిగా అమెరికా గుర్తించింది. వాస్తవానికి 71 సంవత్సరాల సలాముద్దీన్‌ ప్రస్తుతం ఉగ్రవాద కార్యకలాపాల్లో క్రియాశీలంగా లేరని వార్తలు వస్తున్నాయి. ఈ అంశాలను ప్రకటనలో చేర్చడమే తమ ఘన విజయంగా బిజెపి చెప్పుకుంటోంది.

అయితే ప్రపంచ వ్యాప్తంగా ఉగ్రవాదానికి అమెరికా చేస్తున్న సాయంపై నామమాత్రంగానైనా ఆందోళన వ్యక్తం చేయాలన్న తపన ప్రధానిలో కనపడలేదు. ఇరుగు పొరుగు దేశాలను అమెరికా వేదికగా వేలెత్తి చూపడం ద్వారా ఆ దేశాలతో స్నేహ సంబంధాలపై పడే ప్రభావాన్ని అంచనా వేసినట్లు కనిపించలేదు.

ద్వైపాక్షిక చర్చల ద్వారా పరిష్కరించాల్సిన అంశాలలోకి మూడో దేశాన్ని ఆహ్వానించడం ఏ రాజనీతి కిందకు వస్తుందో ఏలిన వారే చెప్పాలి!  ఆర్థికాంశాలకు సంబంధించి ఉమ్మడి ప్రకటనలో చోటు చేసుకున్న స్వేచ్ఛా వాణిజ్య ప్రస్తావన అమెరికాకు ఉపయోగపడేదే! గత ప్రకటనల్లో కనిపించే ఆర్థిక సంబంధాలను మరింత బలోపేతం చేసుకోవాలన్న ఆకాంక్షకు ఇది భిన్నం. అమెరికాకు చెందిన సరుకులు భారతదేశంలోకి ఇబ్బడి ముబ్బడిగా ప్రవేశించడంపై అనేక ఆంక్షలు ఇప్పటి వరకు ఉన్నాయి. ఆ అంక్షలు ఎత్తి వేయాలని కొన్ని సంవత్సరాలుగా అమెరికన్‌ కార్పొరేట్‌ లాబీ ఒత్తిడి చేస్తోంది. అది ఇపుడు నెరవేరింది.

వాతావరణ మార్పులు, సౌరశక్తి వినియోగం వంటి అంశాలు ఉమ్మడి ప్రకటనలో చోటు చేసుకునేవి. ఈ సారి వాటి ఊసే లేకపోగా దివాళా తీసి, వివాదాస్పదంగా మారిన వెస్టింగ్‌హౌస్‌ నుండి ఆరు రియాక్టర్ల కొనుగోలు వంటి అంశాలు అమెరికాకు ఉపయోగపడటంతో పాటు, భారత దృష్టితో చూస్తే తిరోగమనమే!

అమెరికా ప్రయోజనాల కోసం ఆర్థిక వ్యవస్థ తలుపులను మరింత బార్లా తెరవడం, డ్రోన్లతో సహా ఆ దేశ రక్షణ ఉత్పత్తులను భారీగా కొనుగోలు చేయడం అనే అంశాలకే ఉమ్మడి ప్రకటనలోని ఈ భాగం పరిమితమైంది. భారత్‌కు ఒరిగిందేమిటో ప్రధానే వివరించాలి.

ఉత్తరకొరియాను విమర్శించడంలోనూ, దక్షిణ చైనా సముద్ర విషయంలోనూ అమెరికా గొంతునే భారత్‌ మొట్ట మొదటిసారిగా వినిపించింది. వీటన్నింటికన్నా ఆందోళన కలిగిందే అంశమేమిటంటే ఉగ్రవాదాన్ని ఒక మతానికి ముడిపెడుతూ అమెరికా వ్యవహరిస్తున్న ధోరణికి ప్రధాని తానా తందానా అనడం! ఇది ఇప్పటి వరకు ఉగ్రవాదానికి-మతానికి సంబంధం లేదంటూ కేంద్ర ప్రభుత్వం అనుసరిస్తున్న వైఖరికి విరుద్దం.